Alarm në Suedi: Rritet ndjeshëm gonorrea, frikë nga baktere rezistente.

Në Suedi po rritet me shpejtësi numri i personave të infektuar me gonorre, një sëmundje që transmetohet përmes marrëdhënieve seksuale. Sipas të dhënave të fundit, rastet janë rritur me 140% gjatë dhjetë viteve të fundit dhe situata vazhdon të përkeqësohet.

Ekspertët janë të shqetësuar, jo vetëm për përhapjen e madhe, por edhe për faktin se disa lloje të bakterit që shkakton gonorren po bëhen rezistentë ndaj antibiotikëve. Kjo do të thotë që ilaçet e zakonshme mund të mos funksionojnë më.

“Nga viti 2015 deri në 2021 nuk kishim asnjë rast të tillë në Suedi, por në vitin 2022 u zbulua një rast i parë rezistent. Tre vitet e fundit kemi parë deri në tre raste të tilla çdo vit”, thotë Magnus Unemo, ekspert i sëmundjeve infektive dhe profesor në Londër.

Nëse bakteret rezistente përhapen më shumë, Suedia mund të përballet me një epidemi të vështirë për t’u kontrolluar.

Mjekët këshillojnë të gjithë qytetarët të përdorin mbrojtje gjatë marrëdhënieve seksuale dhe të bëjnë kontrolle të rregullta, nëse dyshojnë për ndonjë infeksion.