Analiza: Gjendja mund të përmirësohet për Suedinë, por jo për Moderatët

Fjalimi i Krishtlindjes i kryeministrit Ulf Kristersson (M) ishte i qetë dhe i butë, ashtu si moti i dhjetorit në Suedi. Kështu shkruan Henrik Torehammar në gazetën Svenska Dagbladet (SvD). Në fjalimin e tij, kryeministri tha se inflacioni është mposhtur dhe se Suedia po shkon drejt një situate më të mirë ekonomike.

Megjithatë, sipas Torehammarit, kjo nuk do të thotë se gjendja po përmirësohet edhe për Partinë Moderatore. “Mund të ketë më shumë dritë për Suedinë, por për momentin po errësohet për Moderatët dhe për Ulf Kristerssonin”, shkruan ai, duke iu referuar shifrave të dobëta të partisë në sondazhet e opinionit.

Ai thotë se nuk përjashtohet mundësia që Moderatët të detyrohen të ndërmarrin “masa drastike” nëse mbështetja për partinë nuk rritet së shpejti. Sipas tij, fushata zgjedhore që po afrohet nuk pritet të jetë aq e mërzitshme sa fjalimi i Krishtlindjes.

Të njëjtin mendim ka edhe eksperti politik i TV4, Marcus Oscarsson. Ai thotë se shifrat e Moderatëve në sondazhe nuk përputhen me mesazhet pozitive që kryeministri po jep për ekonominë.

Oscarsson shton se lajmet e mira ekonomike që Kristersson prezantoi nuk i sjellin përfitime vetëm popullit suedez, por edhe vetë kryeministrit. Perspektivat e mira për vitin 2026, sipas tij, “rastësisht” vijnë në të njëjtën kohë kur po afrohet viti i zgjedhjeve.