Andersson: Të vësh në pikëpyetje votat e emigrantëve do të thotë të vësh në pikëpyetje vlerën e tyre

Liderja e Socialdemokratëve (S), Magdalena Andersson, ka reaguar ndaj deklaratave të disa përfaqësuesve të partive të djathta, të cilët kanë fajësuar votat e qytetarëve me prejardhje nga emigracioni për rënien e mbështetjes së krahut të Tidö-s.

Në një konferencë për shtyp, Andersson tha se ata përfaqësues të Sverigedemokraterna (SD) dhe Moderaterna (M) që fajësojnë votat e emigrantëve po vënë në pikëpyetje edhe vlerën e tyre si njerëz.

Ajo iu referua, ndër të tjera, deklaratave të Tobias Andersson, një prej figurave kryesore të SD-së. Ai është një nga disa zëra të krahut të djathtë që, në mënyrë pak a shumë të drejtpërdrejtë, kanë lënë të kuptohet se do të ishte jodemokratike që emigrantët të votonin më shumë për partitë e kuq-gjelbra.

“Ajo që shfaqet në ditën e zgjedhjeve është baza e demokracisë, pra vlera e barabartë e të gjithë njerëzve. Të vësh në pikëpyetje votat e qytetarëve suedezë do të thotë të vësh në pikëpyetje edhe vlerën e tyre si njerëz”, tha Andersson.

Ajo shtoi se nuk habitet që përfaqësues të Sverigedemokraterna shprehen në këtë mënyrë.

“Fakti që sverigedemokratët bëjnë një gjë të tillë nuk e habit askënd. Por me shumë trishtim mund të konstatoj se ka edhe disa moderatë që shprehen në këtë mënyrë”, tha Magdalena Andersson.

Deklaratat e saj vijnë pas reagimeve nga disa figura të së djathtës lidhur me mënyrën se si qytetarët me prejardhje nga emigracioni kanë votuar në zgjedhje.

Burimi: Omni/TT/Svtplay

Link: https://www.svtplay.se/video/ey2andm/svt-nyheter-direkt/nu-borjar-rundorna-hos-talmannen?video=visa&position=2830

https://tt.omni.se/s-ledaren-far-uppdraget-att-forsoka-bilda-ny-regering/a/PdlOVe