Ari në rritje: Çmimi pritet të arrijë 3,000 dollarë për ons gjatë vitit 2025

Pas një viti rekord për arin, me një rritje prej 27% gjatë 2024-ës, çmimi i këtij metali të çmuar pritet të vazhdojë të ngjitet edhe gjatë 2025-ës. Ari arriti në afërsi të 2,800 dollarëve për ons në fund të vitit të kaluar dhe analistët parashikojnë një rritje deri në 3,000 dollarë për ons këtë vit, sipas raporteve nga Bank of America dhe JP Morgan.

Faktorët kryesorë që nxisin këtë trend janë blerjet masive të arit nga bankat qendrore, lehtësimi i politikave monetare nga Rezerva Federale dhe rritja e tensioneve gjeopolitike. Për më tepër, shqetësimet për inflacionin dhe pasigurinë ekonomike kanë forcuar pozitën e arit si një “strehë e sigurt” për investitorët.

Një tjetër element që po ndikon në tregjet është mandati i dytë i Donald Trump si president i SHBA-ve. Politikat e tij, që përfshijnë rrezikun e luftërave të reja tregtare dhe pasigurinë ekonomike, kanë rritur interesin për asetet e sigurta si ari.

Ekspertët e tregut paralajmërojnë se kushtet aktuale ekonomike dhe politike mund ta shtyjnë çmimin e arit në nivele rekord, duke e bërë atë një nga investimet më të preferuara për 2025-ën.