Autoriteti Suedez i Ushqimit paralajmëron: Konservat e bëra në shtëpi mund të jenë vdekjeprurëse.

Italia është përfshirë nga një seri vdekjesh të rënda të shkaktuara nga botulizmi, një helmim i rrallë por shumë i rrezikshëm, që vjen nga një toksinë e prodhuar nga bakteri Clostridium botulinum.

Dy gra kanë ndërruar jetë pasi konsumuan guacamole në një festival në Sardenjë, ndërsa në fillim të gushtit u raportuan edhe tre viktima në Kalabri, pasi kishin ngrënë sanduiçe me sallam dhe perime.

Ushqimet e konservuara në shtëpi në qendër të rrezikut

Sipas autoriteteve italiane, vdekjet lidhen kryesisht me ushqimet e konservuara, veçanërisht ato të përgatitura në kushte shtëpie.

Autoriteti Suedez i Ushqimit ka dalë me një paralajmërim të fortë për të gjithë ata që bëjnë turshi ose konservime në shtëpi. Ekspertët këshillojnë të ndiqet rregulli i njohur si “1–2–3”:

• 1 pjesë uthull 12 %,
• 2 pjesë sheqer,
• 3 pjesë ujë,
  në kombinim me ruajtjen në frigorifer.

“Mund të jetë e mrekullueshme të përfitosh nga produktet e kopshtit, por është thelbësore të ndiqen recetat e provuara. Nuk duhet shpikur apo ndryshuar asgjë nga to,” tha Åsa Rosengren, mikrobiologe në Autoritetin Suedez të Ushqimit, për gazetën Aftonbladet.

Një toksinë me fuqi shkatërruese

Ekspertët paralajmërojnë se botulinum toksina është ndër helmet më të forta të njohura.

“Sasia e vogël sa një gotë raki me këtë toksinë mjafton për të vrarë gjithë popullsinë e Suedisë. Ajo bllokon sinjalet nervore që kontrollojnë muskujt dhe mund të shkaktojë paralizë të plotë, përfshirë muskujt ne rrugët e frymëmarrjes,” thekson Autoriteti Suedez i Shëndetit Publik.

Masat që duhen marrë për parandalim

Autoritetet suedeze japin disa këshilla për të shmangur botulizmin:

• Perimet e konservuara në shtëpi duhen zjerë të paktën tre minuta para konsumimit.
• Ushqimet si salmoni i tymosur duhet të mbahen gjithmonë në frigorifer dhe të mos konsumohen pas datës së skadencës.
• Konservimi duhet të bëhet në kushte që pengojnë rritjen e bakterit, si mjedis acid ose i kripur.
• Peshku i tymosur duhet të ftohet menjëherë në +4 °C dhe peshku i paketuar në vakum nuk duhet të mbahet më gjatë se tre javë.
• Gjatë përgatitjes së turshive të peshkut si salmoni, recetat duhet të ndiqen pikë për pikë:
  • kripa nuk zëvendësohet me kripë minerale (si Seltin),
  • uthulla nuk duhet e cilësisë së dobët,
  • dhe nuk duhet përgatitur më shumë peshk sesa thotë receta.