Bankat e mëdha: Ekonomia suedeze do të kthehet në rritje vitin e ardhshëm

Ekonomia suedeze pritet të marrë kthesë pozitive vitin e ardhshëm, falë uljes së normave të interesit dhe politikës fiskale. Këtë e theksojnë raportet më të fundit të dy bankave kryesore, Swedbank dhe SEB.

“Rruga është e hapur për konsum më të madh”, tha kryeekonomisti i Swedbank, Mattias Persson, në një njoftim për shtyp.

Megjithatë, SEB vëren se familjet suedeze mbeten të kujdesshme dhe se rikuperimi i vërtetë i ekonomisë do të ndihet vetëm në gjysmën e dytë të vitit.

“Pasiguria globale dhe plagët nga vitet me rritje të çmimeve ende rëndojnë mbi besimin e familjeve. Për momentin nuk mjaftojnë as pagat reale që po rriten, as normat më të ulëta të interesit apo uljet e taksave”, u shpreh kryeekonomisti i SEB, Jens Magnusson.

Në parashikimin e saj të fundit, SEB uli pritshmëritë për rritjen e Prodhimit të Brendshëm Bruto (PBB) vitin e ardhshëm në 2,7%, nga 2,9% që parashikonte më parë. Nga ana tjetër, Swedbank pret një rritje prej 2,3%.

Të dy bankat bien dakord se ritmi i rritjes do të varet kryesisht nga sjellja e konsumatorëve.