Bien falimentimet e bizneseve në Suedi, tetori shënon nivelin më të ulët në pesë vjet

Numri i kompanive që kanë falimentuar në Suedi vazhdon të ulet. Gjatë muajit tetor janë regjistruar 827 falimentime, 15% më pak se në muajin shtator. Kjo është shifra më e ulët për muajin tetor gjatë pesë viteve të fundit.

Sipas statistikave të publikuara nga kompania suedeze e informacionit kreditor Syna, falimentimet e bizneseve kanë shënuar rënie edhe në krahasim me fillimin e vitit. Që nga janari, numri i kompanive të falimentuara është ulur me 6%.

Drejtori ekzekutiv i kompanisë Syna, Karl Stjerna, e ka cilësuar këtë zhvillim si një lajm shumë pozitiv për ekonominë suedeze.

“Është padyshim shumë pozitive që presioni i falimentimeve, i cili ka rënduar prej kohësh mbi bizneset suedeze, duket se më në fund ka filluar të zbehet”, është shprehur Stjerna në një komunikatë për shtyp.

Të dhënat tregojnë se gjatë këtij viti numri i falimentimeve ka pasur luhatje nga muaji në muaj. Marsi ishte muaji me numrin më të lartë të falimentimeve, me 1 023 kompani, ndërsa gushti regjistroi numrin më të ulët, me 487 kompani.

Numri i kompanive të falimentuara në Suedi gjatë këtij viti:

• Janar: 864 kompani
• Shkurt: 935 kompani
• Mars: 1 023 kompani
• Prill: 874 kompani
• Maj: 921 kompani
• Qershor: 983 kompani
• Korrik: 580 kompani
• Gusht: 487 kompani
• Shtator: 872 kompani
• Tetor: 827 kompani

Të dhënat e muajit tetor japin një sinjal pozitiv për bizneset suedeze, pasi numri i falimentimeve ka rënë ndjeshëm dhe presioni që ka rënduar mbi kompanitë duket se po lehtësohet.

Burimi: Syna dhe Agjencia Suedeze për Analizën e Rritjes (Myndigheten för tillväxtanalys)/Omni/TT

Link: https://tt.omni.se/konkurserna-minskar-tryck-tycks-ha-slappt/a/Jr00y7