Çmimet e larta të ushqimeve vazhdojnë

Edhe pse inflacioni ka pësuar rënie, konsumatorët nuk duhet të presin ulje të dukshme të çmimeve të ushqimeve. Ekspertët paralajmërojnë se rritjet e ndjeshme që kanë ndodhur në vitet e fundit janë bërë tashmë një “nivel i ri dhe normal”, duke krijuar sfida të reja për buxhetet familjare.

Sipas Ulf Mazur, drejtori i përgjithshëm i Matpriskollen, situata nuk parashikon tronditje të mëtejshme me rritje të papritura çmimesh, por disa produkte mund të shtrenjtohen për shkak të faktorëve klimatikë si përmbytjet apo thatësira.

“Kostot për prodhuesit dhe zinxhirin tregtar nuk kanë rënë sa duhet për të ndikuar në uljen e çmimeve,” deklaroi Mazur për SVT Nyheter.

Statistikat tregojnë se çmimet e ushqimeve janë rritur me 25% gjatë tre viteve të fundit, duke ndikuar ndjeshëm te fuqia blerëse e konsumatorëve. Ndërsa inflacioni mund të jetë ngadalësuar, ekspertët sugjerojnë që rritja e çmimeve të ushqimeve është tashmë një realitet me të cilin konsumatorët duhet të mësohen.