Çmimet e ushqimeve në Suedi ranë më shumë se në 30 vitet e fundit pas uljes së TVSH-së

Çmimet e ushqimeve në Suedi kanë shënuar një rënie të madhe gjatë muajit prill, sipas statistikave të reja të publikuara nga organizata suedeze e statistikave, Statistics Sweden (SCB).

Sipas raportit, çmimet e ushqimeve dhe pijeve joalkoolike ranë me 5.5% nga marsi në prill. Kjo është rënia më e madhe e regjistruar në më shumë se 30 vjet.

“Ushqimet dhe pijet joalkoolike nuk kanë rënë kaq shumë në 30 vitet e fundit, as nga një muaj në tjetrin dhe as në krahasim me një vit më parë”, tha Frida Stark, statistikane e çmimeve në SCB.

Një nga arsyet kryesore të kësaj uljeje është vendimi i qeverisë suedeze për të përgjysmuar TVSH-në për ushqimet. Nga fillimi i prillit, TVSH-ja për produktet ushqimore u ul nga 12% në 6%. Sipas statistikave, kjo ulje është reflektuar dukshëm edhe në çmimet nëpër dyqane.

Raporti tregon gjithashtu se edhe çmimet e energjisë elektrike kanë rënë gjatë kësaj periudhe.

Ndërkohë, çmimet e karburanteve kanë shënuar rritje të madhe për shkak të luftës në Lindjen e Mesme. Sipas SCB-së, karburantet janë tani afro 30% më të shtrenjta krahasuar me të njëjtën periudhë të vitit të kaluar, ndërsa rritja më e madhe është regjistruar te nafta.

Në përgjithësi, inflacioni në Suedi aktualisht është 0.8% në bazë vjetore. Kjo shifër konfirmon edhe të dhënat paraprake për inflacionin që ishin publikuar më herët.

Burimi:SCB

Link: https://www.scb.se/hitta-statistik/statistik-efter-amne/priser-och-ekonomiska-tendenser/priser/konsumentprisindex-kpi/pong/statistiknyhet/konsumentprisindex-kpi-april-2026/