Çmimi i benzinës dhe naftës pritet të ulet, por jo aq sa çmimi i naftës bruto

Rënia e çmimit të naftës në tregjet ndërkombëtare pritet të sjellë ulje të çmimeve të benzinës dhe naftës për automjete brenda pak ditësh. Megjithatë, ulja nuk do të jetë aq e madhe sa rënia e çmimit të naftës bruto, bëjnë të ditur ekspertët për gazetën suedeze Dagens Nyheter (DN).

Analistja e naftës në bankën Nordea, Thina Saltvedt, shpjegon se ecuria e çmimit të naftës do të varet shumë nga zhvillimet mes Iranit dhe Shteteve të Bashkuara të Amerikës. Sipas saj, një rol të rëndësishëm do të luajë fakti nëse të dyja vendet do të zhvillojnë negociata dhe çfarë rezultatesh do të kenë ato.

Një tjetër faktor që mund të ndikojë në çmimet e karburanteve është afrimi i dimrit, pasi gjatë kësaj periudhe rritet përdorimi i naftës për ngrohjen e banesave.

“Tani po hyjmë në një periudhë kur përdoret shumë naftë për ngrohje. Kjo mund të bëjë që ulja e çmimeve të karburanteve të jetë më e vogël, edhe pse çmimi i naftës bruto po bie ndjeshëm”, shprehet Saltvedt.

Ndërkohë, Christian Kopfer, analist i lëndëve të para në kompaninë Arctic Securities, vlerëson se çmimet e benzinës dhe naftës duhet të fillojnë të ulen me shumë gjasa brenda pak ditësh. Sipas tij, zakonisht rënia e çmimit të naftës në tregjet ndërkombëtare reflektohet shumë shpejt edhe te çmimet që paguajnë konsumatorët në pompat e karburantit.

Sipas të dhënave të fundit, një fuçi naftë Brent ka rënë nën nivelin e 100 dollarëve për herë të parë pas një muaji. Që nga dita e premte, çmimi i saj ka shënuar një rënie prej 12%.

Burimi: DN/Vibilagare

Link: https://www.dn.se/ekonomi/experten-efter-oljeraset-prissankningarna-kommer/

https://www.vibilagare.se/nyheter/bensinen-sanks-nastan-en-krona-lagsta-priset-sedan-augusti