Coop tërheq nga tregu vezët Änglamark për shkak të dyshimeve për salmonelë

Kompania Coop ka njoftuar se po tërheq nga tregu paketimet me 6 vezë të markës Änglamark, pasi dyshohet se mund të jenë të kontaminuara me salmonelë.

Në një njoftim për shtyp, Coop ka sqaruar se furnizuesi i vezëve ka zbuluar salmonelë në një stallë  gjatë një kontrolli rutinë. Si masë sigurie, kompania ka vendosur të tërheqë nga tregu të gjitha vezët që mund të jenë prekur.

Tërheqja vlen për paketimet me afatin e konsumimit deri më 2 nëntor.

Coop u bën thirrje të gjithë konsumatorëve që kanë blerë këtë produkt me afatin e përmendur, që t’i kthejnë vezët në çdo dyqan Coop. Klientët do të marrin paratë mbrapsht, pa pasur nevojë për kuponin e blerjes.

“Siguria e konsumatorëve është gjithmonë përparësia jonë. Prandaj po veprojmë menjëherë për të shmangur çdo rrezik të mundshëm”, thuhet në njoftimin e kompanisë.

Burimi: Aftonbladet