Danimarka drejt reformave të mëdha: Stomatologji falas, transport publik falas për të rinjtë dhe ulje të TVSH-së për ushqimet

Qeveria e re e Danimarkës ka arritur një marrëveshje me partitë bashkëpunëtore Enhedslisten dhe Alternativet për një sërë reformash të rëndësishme. Lajmi u bë i ditur pas një takimi të zhvilluar të martën në mëngjes dhe është raportuar gjerësisht nga mediat daneze.

Mes reformave të propozuara janë ofrimi i kujdesit dentar falas për qytetarët, udhëtimet falas me transportin publik për të rinjtë, përgjysmimi i TVSH-së për ushqimet si dhe krijimi i pesë parqeve të reja kombëtare në zonat detare të vendit.

Kryetari i partisë Enhedslisten, Pelle Dragsted, u shpreh i kënaqur me rezultatet e negociatave.

“Ne kemi negociuar dhe kemi arritur rezultate,” tha ai për televizionin danez TV2.

Edhe liderja e partisë Alternativet, Franciska Rosenkilde, e cilësoi marrëveshjen si një sukses të madh.

“Kemi marrë gjithçka për të cilën dolëm në zgjedhje dhe shumë, shumë më tepër,” deklaroi ajo.

Një ditë më parë, të hënën, u konfirmua se Socialdemokratët, Radikale Venstre, Socialistisk Folkeparti dhe Moderaterne do të formojnë qeverinë e re të Danimarkës. Megjithatë, këto parti nuk kanë shumicën e nevojshme në parlament dhe për këtë arsye do të duhet të bashkëpunojnë dhe të negociojnë me parti të tjera për miratimin e politikave të tyre.

Sipas informacioneve të siguruara nga TV2, qeveria e re po planifikon gjithashtu ulje shumë të mëdha të taksave për qytetarët me të ardhurat më të larta. Deri tani nuk është bërë e ditur se cila nga partitë pjesëmarrëse në negociata ka qenë nismëtarja e këtij propozimi.

Nëse këto reforma miratohen, ato pritet të kenë ndikim të madh në jetën e përditshme të qytetarëve danezë, veçanërisht në fushat e shëndetësisë, transportit, mbrojtjes së mjedisit dhe ekonomisë familjare.

Burimi: TV2/Ekstrabladet/berlingske

Link: https://nyheder.tv2.dk/live/politik/2026-02-26-folketingsvalg-2026/tandlaegen-bliver-gratis-for-alle-siger-dragsted?entry=eeaf5e37-7e69-4b66-9128-bce9ac8906c5

https://ekstrabladet.dk/nyheder/politik/danskpolitik/enhedslisten-gratis-tandlaege-til-alle/11195412

https://www.berlingske.dk/politik/seneste-nyt-om-dansk-politik–foelg-med-her-63