Debat i ashpër për tavanin e ndihmave: “Qeveria përdor raste që pothuajse nuk ekzistojnë”

Në emisionin Agenda të televizionit suedez SVT, u zhvillua një debat i fortë mes të djathtës dhe të majtës për planin e qeverisë për të vendosur një tavan për përfitimet sociale.

Nga njëra anë ishte ministrja e sigurimeve shoqërore nga partia Moderaterna, Anna Tenje, dhe nga ana tjetër socialdemokratja Katrin Stjernfeldt Jammeh, e cila është gjithashtu kryetare e komunës së Malmö-s.

Anna Tenje mbrojti planin e qeverisë duke thënë se tavanet e ndihmave do të ndihmojnë më shumë njerëz të hyjnë në tregun e punës dhe kështu të ulet përjashtimi social. Sipas saj, një familje mund të marrë deri në 46 500 korona në muaj nga përfitimet, dhe puna duhet gjithmonë të shpërblehet më shumë se marrja e ndihmave.

Por Katrin Stjernfeldt Jammeh e kundërshtoi këtë, duke thënë se kjo shumë bazohet në një “rast tipik që në praktikë pothuajse nuk ekziston”. Ajo theksoi se mesatarja reale për një familje me katër fëmijë është rreth 19 000 korona në muaj.

Sipas saj, qeveria duhet të përqendrohet më shumë në zhvillimin e tregut të punës dhe në krijimin e më shumë mundësive për punësim, në vend që të shkurtojë ndihmat për familjet që kanë nevojë.