Deklarimet 2026: Gabimet më të shpeshta që duhet t’i shmangni këtë vit

Po afrohet periudha e deklarimit të të ardhurave në Suedi. Media suedeze Nyheter24 ka biseduar me ekspertin e deklaratave të Skatteverket, Johan Schaumann, i cili tregon se cilat janë gabimet më të zakonshme që qytetarët bëjnë gjatë deklarimit, gabime që mund t’ju kushtojnë para.

Afatet kryesore për deklaratën 2026

Procesi i deklarimit po afron dhe është e rëndësishme që qytetarët të kenë parasysh datat kryesore. 1 marsi është dita e fundit për të siguruar një kuti postare digjitale, si për shembull Kivra, për të marrë deklaratën në mënyrë digjitale dhe më herët se ata që e marrin me postë të zakonshme.

Skatteverket do të fillojë dërgimin e deklaratave digjitale nga 6 marsi, ndërsa në prill do të fillojë pagesa e kthimit të taksave për ata që kanë para për të marrë dhe që e kanë miratuar deklaratën më së voni deri më 31 mars.

Eksperti Johan Schaumann thekson se njohja e afateve është thelbësore për të shmangur problemet e panevojshme.

Sipas tij, këto janë datat më të rëndësishme për deklaratën 2026:

• 1 mars – afati i fundit për të siguruar një kuti postare digjitale për marrjen e deklaratës.
• 2–6 mars – Skatteverket dërgon deklaratat për të gjithë ata që kanë kuti postare digjitale. Pas kësaj, deklaratat bëhen të disponueshme në Mina sidor për të gjithë qytetarët, edhe pa kuti digjitale.
• 17 mars – hapen shërbimet online për deklarim. Shumë persona hyjnë që në ditën e parë, por sistemi zakonisht funksionon normalisht. Mund të shfaqet një njoftim për ngarkesë të lartë dhe të kërkohet të provohet më vonë.
• 31 mars – afati i fundit për të deklaruar nëse dëshironi të merrni kthimin e taksave në fillim të prillit. Kjo vlen vetëm për ata që vetëm miratojnë të dhënat e paraplotësuara. Personat që bëjnë ndryshime ose shtesa do të duhet të presin deri në qershor.
• 4 maj – afati i fundit për deklarim për të gjithë. Ata që kanë nevojë për më shumë kohë mund të kërkojnë shtyrje përmes Mina sidor, por kjo duhet bërë para 4 majit.

Kontrolloni me kujdes të dhënat e paraplotësuara

Një nga gabimet më të zakonshme është moskontrollimi i të dhënave që Skatteverket ka paraplotësuar në deklaratë.

Sipas Schaumann, në shumicën e rasteve këto të dhëna janë të sakta, por çdo vit ka raste kur ndodhin gabime. Për këtë arsye, qytetarët këshillohen t’i kontrollojnë me kujdes.

Nëse zbulohet një gabim, mënyra më e mirë është të kontaktohet institucioni ose pala që ka dërguar informacionin, në mënyrë që ata ta korrigjojnë atë. Pas korrigjimit, deklaruesi mund ta miratojë informacionin e saktë.

Eksperti paralajmëron se nëse qytetari bën vetë ndryshime në deklaratë, kjo mund të çojë në vonesë të kthimit të taksave dhe, në disa raste, kthimi i parave nuk bëhet në prill.

Të ardhurat nga jashtë vendit shpesh nuk janë të paraplotësuara

Një tjetër gabim i shpeshtë lidhet me të ardhurat dhe shpenzimet që vijnë nga jashtë Suedisë.

Sipas Skatteverket, informacione të tilla shumë rrallë arrijnë në kohë për t’u paraplotësuar në deklaratë. Për këtë arsye, qytetarët duhet pothuajse gjithmonë t’i shtojnë vetë këto të dhëna.

Këtu përfshihen:

• paga nga punë ose detyra në vende të tjera,
• pensione nga skema pensioni jashtë vendit,
• interesa ose dividentë nga investime të huaja,
• interesa të paguara për kredi të marra jashtë Suedisë.

Gjithashtu, qytetarët duhet të kenë parasysh ndryshimet e fundit në rregullat për kreditë pa kolateral, si dhe për fitimet ose humbjet nga letra me vlerë.

Gabimi më i zakonshëm: zbritja për udhëtimin drejt punës

Sipas Johan Schaumann, gabimi më i shpeshtë që bëjnë qytetarët gjatë deklarimit lidhet me zbritjen për udhëtimin nga dhe drejt vendit të punës.

Për të pasur të drejtë për këtë zbritje, kërkohet që udhëtimi me mjet privat t’ju kursejë të paktën dy orë në ditë krahasuar me transportin publik.

Skatteverket kontrollon një pjesë të madhe të këtyre zbritjeve dhe, sipas statistikave, më shumë se gjysma e tyre refuzohen plotësisht ose pjesërisht. Arsyeja kryesore është se kriteri i kursimit të kohës nuk plotësohet.

Burimi: Nyheter24

Link: https://nyheter24.se/nyheter/ekonomi/privatekonomi/1457417-deklaration-2026-vanliga-misstagen-du-maste-undvika-i-ar