Deklarimi i taksave 2026 në Suedi ka filluar, gjithçka që duhet të dini?

Deklarimi i taksave për vitin 2026 ka nisur më 17 mars dhe qytetarët tani mund të dorëzojnë deklaratat e tyre. Ndryshe nga vitet e kaluara, aplikacioni i Skatteverket nuk përdoret më deklarimi bëhet vetëm përmes faqes zyrtare në internet.

Çfarë të dhënash duhet të dorëzoni?

Punëdhënësit dhe bankat dërgojnë automatikisht informacion për të ardhurat tuaja, përfshirë pagat dhe të ardhurat nga kapitali. Megjithatë, përgjegjësia për të kontrolluar nëse këto të dhëna janë të sakta mbetet tek ju.

Çfarë duhet të shtoni vetë?

Në disa raste, ju duhet të plotësoni vetë informacion shtesë në deklaratë. Kjo përfshin:

• Të ardhura nga dhënia me qira e banesës
• Blerje ose shitje aksionesh
• Shitje të produkteve përmes platformave online
• Fitime nga kriptovalutat, të cilat konsiderohen të ardhura dhe duhet të deklarohen

Cilat janë zbritjet më të zakonshme?

Zbritja më e zakonshme lidhet me udhëtimet për në punë dhe nga puna, por sipas Skatteverket, këtu bëhen edhe më shumë gabime.

Për të përfituar këtë zbritje:

• Shpenzimet duhet të kalojnë 11,000 krona
• Distanca mes shtëpisë dhe punës duhet të jetë të paktën 5 kilometra
• Nëse përdorni makinë, duhet të kurseni të paktën 2 orë në ditë krahasuar me transportin publik

Një risi për këtë vit është se për kreditë pa kolateral (blancolån), mund të zbritet vetëm gjysma e interesit. Ndërsa për kreditë e shtëpisë (bolån), zbritja mbetet e plotë.

Si funksionojnë zbritjet RUT dhe ROT?

Zbritjet për shërbime shtëpiake (RUT) dhe punime ndërtimi (ROT) janë ndër më të përdorurat. Maksimumi që mund të përfitoni është 75,000 krona në vit, ku jo më shumë se 50,000 krona mund të jenë nga ROT. Mundësia për të përfituar varet nga sa taksa keni paguar dhe nga zbritjet e tjera që keni bërë.

Kur vjen kthimi i taksave?

Nëse nuk bëni ndryshime në deklaratë dhe e dorëzoni atë deri më 31 mars, kthimi i taksave pritet të bëhet mes datave 7 dhe 9 prill. Kusht është që të keni regjistruar një llogari bankare pranë Skatteverket.

Nëse bëni ndryshime, afati i fundit për dorëzim është 4 maji.

Çfarë është restskatt?

“Restskatt” është shuma që duhet të paguani nëse gjatë vitit keni paguar më pak taksa sesa duhet. Kjo mund të ndodhë, për shembull, nëse keni pasur fitime të mëdha nga shitja e një banese ose nga tregtia me aksione.

Çfarë ndodh nëse bëni gabime?

Nëse dorëzoni informacione të pasakta, edhe pa qëllim, mund të përballeni me një gjobë tatimore. Sipas rregullave, mund të shtohet deri në 40% mbi shumën e taksës që duhet të paguani.

Ky është një vit i rëndësishëm për deklarimin, ndaj këshillohet që çdo qytetar të kontrollojë me kujdes të dhënat përpara dorëzimit.

Burimi: SVT

Link: https://www.svt.se/nyheter/ekonomi/allt-du-behover-veta-om-deklarationen-2026