Dhunë në rritje në shkollat suedeze: Raportohen 355 raste në vitin 2024

Dhuna në shkollat fillore dhe të mesme të ulëta (F-6) në Suedi ka arritur nivele alarmante. Sipas një raporti të fundit nga SVT Nyheter, rastet e raportuara për dhunë fizike janë rritur me 60% gjatë pesë viteve të fundit. Gjatë periudhës janar-nëntor 2024, janë regjistruar 355 denoncime pranë Inspektoratit të Punës.

Kryetarja e sindikatës Sveriges Lärare, Anna Olskog, ka ngritur shqetësimin se ky fenomen nuk është i kufizuar në zonat me probleme socio-ekonomike.

– Shumë besojnë se është një problem i lidhur me varfërinë, por dhuna ndodh në të gjithë vendin, në shumë klasa, tha Olskog.

Rastet shqetësuese të dhunës në shkolla

Raporti përmend shembuj konkretë të incidenteve të dhunshme që kanë ndodhur në shkollat suedeze. Një nga rastet më tronditëse përfshin një pedagoge shtatzënë, e cila humbi fëmijën pas një goditjeje në bark nga një nxënës. Ky rast ka ngjallur reagime të ashpra dhe kërkesa për masa të menjëhershme.

Kërkohen masa të reja për të adresuar problemin

Rritja e dhunës ka shtuar presionin ndaj vendimmarrësve suedezë. Sindikata Sveriges Lärare kërkon më shumë burime për trajnimet e stafit arsimor dhe mbështetje për të krijuar një ambient më të sigurt në shkolla.

Ministrja e Arsimit, Lotta Edholm, ka premtuar se qeveria do të ndërmarrë hapa konkretë për të adresuar situatën, duke kërkuar një qasje më të ashpër nga prindërit dhe shkollat.

Situata e dhunës në shkolla mbetet një ndër sfidat më të mëdha për sistemin arsimor suedez dhe kërkon zgjidhje urgjente për të mbrojtur nxënësit dhe stafin arsimor.