Drejtori i Svenskt Näringsliv kritikon politikanët: Kanë frikë të marrin vendime që nuk sjellin vota

Suedja po humbet epërsinë ekonomike dhe rritja po ngadalësohet, sepse politikanët mendojnë vetëm për fitimin e zgjedhjeve të ardhshme. Kështu ka deklaruar drejtori i përgjithshëm i Svenskt Näringsliv, Jan-Olof Jacke, në një intervistë për gazetën suedeze Dagens Nyheter (DN).

“Sot jemi në një situatë ku politika ka frikë të marrë vendime që nuk tërheqin votues në zgjedhjet e ardhshme,” tha Jacke për DN.

Ai shprehet se përçarja mes energjisë me erë dhe energjisë bërthamore ka qenë shkatërruese për Suedinë, sepse kompanitë kanë nevojë për të dyja për të pasur furnizim të qëndrueshëm me energji dhe çmime konkurruese.

Jacke kritikoi gjithashtu rritjen e pagës minimale për marrjen e lejeve të punës, që është pjesë e politikave të qeverisë Tidö. Sipas tij, kjo masë e vështirëson ardhjen e punëtorëve të huaj në Suedi, edhe pse ekonomia suedeze ka nevojë për fuqi punëtore nga jashtë.

Me deklaratat e tij, kreu i organizatës më të madhe të biznesit në Suedi kërkon që politikanët të mendojnë më afatgjatë dhe të marrin vendime që forcojnë rritjen ekonomike, edhe nëse ato nuk janë menjëherë tërheqëse për votuesit.