Dyshohet për Dronë në Landvetter, ndalohen fluturimet

Të paktën një dron është parë në aeroportin Landvetter në Göteborg, dhe për shkak të tij, asnjë avion nuk po lejohet të ulet për momentin.

Björn Stavås nga Autoriteti i Aviacionit tha se aktualisht ka një ndërprerje në trafikun ajror. Vëzhgimi i dronit u bë pak para orës 18:00 të së enjtes në mbrëmje. Ai konfirmoi se dronë janë vërejtur dhe trafiku ajror është ndalur përkohësisht.

Si pasojë, dy fluturime një nga Müncheni dhe një nga Frankfurti janë devijuar drejt Kopenhagenit, ndërsa një fluturim nga Landvetter për në München është anuluar. Stavås shtoi se personat që janë në ajër janë informuar për situatën.

Policia ka dërguar disa patrulla në aeroport për të kontrolluar situatën. Johan Håkansson nga policia e rajonit Perëndimor tha:

“Jemi aty dhe përpiqemi të verifikojmë këto informacione.”

Një dëshmitar që foli me gazetën Aftonbladet tha se ka arritur të fotografojë dronin:

“Po fotografoja avionët dhe pashë diçka të vogël në qiell që e fotografova. Më pas kuptova se ishte një dron, sepse ishte i vogël dhe kishte drita,” tha ai.

Edhe Swedavia, kompania që menaxhon aeroportet, konfirmoi se hapësira ajrore mbi Landvetter është e mbyllur:

“Hapësira ajrore mbi Landvetter është aktualisht e mbyllur për shkak të indikacioneve për një dron të dyshuar. Siguria është gjithmonë prioritet dhe hapësira ajrore do të mbetet e mbyllur derisa policia të hetojë. Çështjet e tjera iu referohen policisë,” tha Susanne Norman, drejtoreshë e aeroportit, në një e-mail për Aftonbladet.

Burimi: Aftonbladet