Ekspertët: Mos u fokusoni vetëm te tarifa kur blini një apartament

Personat që planifikojnë të blejnë një apartament duhet të shikojnë me kujdes gjendjen ekonomike të shoqatës së banorëve (bostadsrättsförening), dhe jo vetëm tarifën mujore që paguajnë pronarët.

Ekspertët, në një prononcim për gazetën Dagens Industri (DI), këshillojnë blerësit që fillimisht të kontrollojnë disa tregues të rëndësishëm të ekonomisë së shoqatës.

Një nga pikat kryesore është kursimi për çdo metër katror të sipërfaqes së banimit. Sipas ekspertëve, kursimi duhet të jetë pak më shumë se 300 korona për metër katror. Një analizë e publikuar në pranverë tregoi se 13% e shoqatave të banesave nuk e arrijnë këtë nivel kursimi.

Por ekspertët paralajmërojnë se blerësit nuk duhet të shohin vetëm tarifën mujore.

Një tarifë e lartë mund të duket në pamje të parë si diçka negative. Megjithatë, ajo mund të tregojë edhe se shoqata ka marrë masa për të përmirësuar ekonominë e saj dhe po mbledh më shumë para për të përballuar shpenzimet dhe mirëmbajtjen e ardhshme.

Në të njëjtën mënyrë, një tarifë e ulët nuk do të thotë domosdoshmërisht se ekonomia e shoqatës është e mirë.

Për këtë arsye, një person që dëshiron të blejë apartament duhet të bëjë një kontroll më të gjerë të ekonomisë së shoqatës. Përveç tarifës, duhet të shikojë punimet dhe mirëmbajtjet që janë planifikuar, nivelin e kursimeve dhe borxhet e shoqatës.

Ekspertët theksojnë se të gjitha këto pika duhet të shqyrtohen së bashku për të krijuar një pamje më të qartë të gjendjes ekonomike të shoqatës dhe për të vlerësuar më mirë nëse apartamenti është një blerje e mirë.

Burimi:DI

Link: https://www.di.se/nyheter/svarsalt-i-vissa-brfer-experternas-varningsklockor/