Eskilstuna: Çifti Mashtroi për 433,000 Korona, Borxhi do të Shlyhet për 36 Vjet

Një çift nga Eskilstuna është zbuluar se ka përfituar mbi 433,000 korona suedeze në ndihmë sociale të pamerituar, duke fshehur informacion mbi udhëtimet e pushimeve dhe pasuritë që posedonin, raporton gazeta Expressen. Zbulimi u bë gjatë një kontrolli të rreptë pranverën e vitit të kaluar, kur autoritetet vunë re se çifti kishte llogari bankare të paregjistruara dhe kishte kryer transferta të mëdha parash, si dhe udhëtime jashtë vendit me familjen.

Pas zbardhjes së rastit, çifti është dënuar të kthejë shumën e përfituar. Megjithatë, një vendim i diskutueshëm nga gjykata u ka lejuar atyre të shlyejnë borxhin me vetëm 1,000 korona në muaj, gjë që do të zgjasë plot 36 vjet.

Komuna e Eskilstunës ka deklaruar se plani i pagesës është rezultat i një keqkuptimi administrativ. Sipas tyre, gabimi ndodhi gjatë përgatitjes së kërkesës për në gjykatë, ku u shënua gabimisht shuma mujore e kthimit të borxhit. Megjithatë, përfaqësuesi i çiftit insiston se plani i pagesës është tashmë i vlefshëm dhe do të respektohet sipas këtij ritmi.

Kjo ngjarje ka ngjallur reagime në publik për mënyrën se si trajtohen rastet e mashtrimit financiar, veçanërisht në lidhje me përfitimin e ndihmave sociale.