Euro digjitale në horizont, si do të ndikohen pagesat në Europë.

Debati rreth përdorimit të parasë fizike vazhdon të jetë një temë e rëndësishme në sistemet e pagesave në mbarë botën. Tani, Bashkimi Europian po planifikon futjen e një alternative digjitale për euron, të njohur si euro digjitale ose e-euro.

Gjithnjë e më shumë vende po reduktojnë përdorimin e parasë cash dhe në disa vende pagesat me para fizike nuk pranohen më. Një shembull konkret është Danimarka, ku banka qendrore hoqi nga qarkullimi kartëmonedhën 1 000 korona në maj të vitit 2025, ndërkohë që disa seri më të vjetra kartëmonedhash u nxorën gjithashtu jashtë përdorimit.

Euro digjitale nuk do të zëvendësojë paranë cash

Banka Qendrore Evropiane (ECB) po shqyrton mundësinë e futjes së e-euros, e cila do të përdoret së bashku me paranë fizike gjatë një periudhe kalimtare.

ECB thekson qartë se euro digjitale nuk do të zëvendësojë paranë cash, veçanërisht për pensionistët dhe personat që varen nga pagesat fizike.

“Euro digjitale do të plotësonte paranë cash, jo ta zëvendësonte atë”, thuhet në njoftimin zyrtar të bankës.

Qëllimi: ulje kostosh dhe pagesa më të lehta

Sipas Komisionit Evropian, qëllimi kryesor i e-euros është ulja e kostove për shtypjen, transportin dhe ruajtjen e kartëmonedhave, si dhe thjeshtimi i pagesave ndërkufitare brenda Evropës.

Monedha digjitale pritet gjithashtu të rrisë gjurmueshmërinë e transaksioneve financiare, ndërkohë që rregulla të posaçme do të garantojnë mbrojtjen e privatësisë personale të qytetarëve.

Kalimi do të jetë sfidues

Megjithatë, kalimi drejt pagesave digjitale nuk pritet të jetë i lehtë.

Personat e moshuar dhe ata që jetojnë në zona të thella rurale rrezikojnë të mbeten jashtë sistemit nëse pagesat digjitale bëhen dominuese. Për këtë arsye, do të nevojiten trajnim, informim dhe mbështetje teknike.

Po ashtu, sistemet e reja duhet të jenë të sigurta ndaj defekteve teknike dhe sulmeve kibernetike, për të garantuar funksionimin normal të pagesave.

Aktualisht, po zhvillohen testime, studime dhe konsultime, me synimin që paraja cash dhe euro digjitale të ekzistojnë paralelisht, pa përjashtuar asnjë grup shoqëror.

Burimi: Nyheter24.se