Falimentimet në Suedi drejt niveleve të krizës së viteve ’90

Suedia po përballet me një valë të madhe falimentimesh që i afrohet niveleve të krizës ekonomike të viteve ’90. Sipas një raporti të fundit nga Creditsafe, edhe pse në nëntor numri i falimentimeve ra me 1%, ato mbetën në nivele rekord krahasuar me vitin e kaluar.

Në total, gjatë vitit 2024 janë regjistruar 9,197 falimentime, një rritje prej 24% në krahasim me të njëjtën periudhë të vitit të kaluar. Creditsafe paralajmëron se deri në fund të vitit numri i falimentimeve mund të kalojë 10,000 kompani aksionare – një rekord që nuk është parë në Suedi që nga kriza e viteve ’90.

“Historikisht, këto janë shifra shumë të larta,” tha Henrik Jacobsson, CEO i Creditsafe, në një deklaratë për shtyp.

Raporti nxjerr në pah ndikimin e vështirësive ekonomike aktuale dhe presionin që bizneset suedeze po ndiejnë në një periudhë të pasigurt financiare.