Favoritët për Çmimin Nobel në Kimi 2024: Studiuesit që kanë zgjidhur një nga sfidat më të mëdha shkencore.

Ndërsa bota pret shpalljen e Çmimit Nobel për Kimi, spekulimet rreth fituesve të mundshëm po intensifikohen. Benjamin List, fitues i Nobelit në Kimi në vitin 2021, beson se studiuesit që kanë zhvilluar miliona struktura 3D të proteinave mund të jenë fituesit e këtij viti.

“Sipas mendimit tim, ata kanë zgjidhur një nga sfidat më të mëdha të mjekësisë, biologjisë dhe kimisë,” tha List për agjencinë TT.

Një tjetër emër i përfolur është Omar M. Yaghi, profesor në UC Berkeley, i njohur për krijimin e një materiali inovativ që mund të ruajë gazra toksikë në elektronikë. Edhe Karl Deisseroth nga Universiteti Stanford është përmendur si një kandidat potencial, falë metodës së tij për studimin e epilepsisë.

Fituesit e viteve të mëparshme

•2023: Moungi G. Bawendi, Louis E. Brus dhe Alexei E. Ekimov (SHBA), për zbulimin e pikave kuantike, që ndihmojnë në ndriçimin e ekraneve dhe përmirësojnë dritën në llampa LED, si dhe në hartimin e indeve biologjike.

•2022: Carolyn Bertozzi (SHBA), Morten Meldal (Danimarkë), dhe Barry Sharpless (SHBA), për zhvillimin e kimisë klik, një teknikë që ndihmon në ndërtimin e molekulave dhe zhvillimin e ilaçeve kundër kancerit.

•2021: Benjamin List (Gjermani) dhe David MacMillan (SHBA), për zhvillimin e katalizës asimetrike organike, një mjet kyç për kërkimet në farmaceutikë.

Të gjitha këto spekulime mbeten të hapura, por pa dyshim, çmimi i këtij viti pritet të nderojë një tjetër arritje madhore që mund të revolucionarizojë fushën e kimisë dhe shkencave natyrore.