FI: Klientët e bankave duhet të zgjohen, mos i lini paratë në llogari pa interes.

Autoriteti Suedez i Mbikëqyrjes Financiare (FI) u bën thirrje klientëve të bankave që të jenë më të kujdesshëm dhe të kërkues ndaj bankave.

Sipas ekonomistes së FI-së për mbrojtjen e konsumatorit, Moa Langemark, shumë njerëz nuk ndryshojnë bankë ose nuk kërkojnë kushte më të mira, dhe kjo është një arsye pse bankat suedeze po nxjerrin fitime të mëdha. Vetëm në tremujorin e dytë të vitit, fitimi i përgjithshëm i bankave në Suedi ishte 44 miliardë korona.

“Nëse dikush mendon se këto fitime janë të tepruara, atëherë duhet të bëhet më aktiv. Mos mbani shumë para në llogari me interes të ulët dhe kontrolloni tarifat që paguani për investimet”, thotë Langemark.

Ajo nxit klientët që të krahasojnë ofertat nga bankat e ndryshme, të kërkojnë interes më të lartë për kursimet dhe të mos paguajnë tarifa të panevojshme për fondet e investimit.