Fillon sezoni i deklarimit: “Shumë persona shqetësohen kot”

Së shpejti, Skatteverket do të nisë dërgimin e deklaratave tatimore për të gjithë personat që kanë kuti postare digjitale. Megjithatë, shumë të rinj ndihen të pasigurt për atë që duhet të kontrollojnë dhe verifikojnë, shkruan TT.

Sipas një sondazhi të realizuar vitin e kaluar nga Verian për Familjens jurist, 18% e të pyeturve thanë se kishin njohuri të dobëta për deklarimin tatimor. Pasiguria ishte më e madhe tek të rinjtë.

Por sipas ekspertit të deklarimeve në Skatteverket, Johan Schauman, shumë njerëz shqetësohen pa nevojë. Ai thotë se procesi sot është shumë më i thjeshtë se më parë.

“Nuk është si dikur, kur kishe njëqind dosje dhe punoje tri net rresht”, thotë ai për agjencinë e lajmeve.

Ne kemi punuar gjatë për ta bërë më të lehtë procesin, prandaj mjafton ta hapësh deklaratën, ta kontrollosh dhe ta miratosh.

Këshilla për ata që deklarojnë për herë të parë

Nëse ke shitur aksione:

Mund të zotërosh aksione deri në 300 000 korona pa pasur efekt tatimor. Kjo do të thotë se të rinjtë mund të kursejnë pa u shqetësuar menjëherë për taksat.

Por nëse i shet aksionet, në deklaratë shfaqen të dhëna për ato që janë shitur. Atëherë duhet të shtosh edhe çmimin me të cilin i ke blerë.

Nëse jep me qira banesën private:

Në faqen e Skatteverket mund të plotësosh të dhënat për qiranë për të parë nëse duhet të paguash taksë.

Zakonisht nuk paguan taksë nëse të ardhurat nga qiraja janë nën 40 000 korona.

Zbritje për udhëtimet vajtje-ardhje në punë:

Për të përfituar zbritje, distanca duhet të jetë të paktën pesë kilometra në një drejtim. Gjithashtu duhet të ketë një kursim të qartë kohe nëse përdor makinën në vend të transportit publik.

Në faqen e Skatteverket mund të kontrollosh nëse ke të drejtë për këtë zbritje.

Nëse pret të marrësh para mbrapsht:

Që paratë të të kalohen në llogari, duhet të regjistrosh një llogari bankare te Skatteverket. Këtë mund ta bësh gjatë deklarimit në shërbimin elektronik “Inkomstdeklaration 1”. Llogarinë mund ta regjistrosh edhe përmes shërbimeve elektronike “Mina sidor” ose “Skattekonto”.

Burimi: Skatteverket/TT/Omni

Link: https://tt.omni.se/dags-att-deklarera-har-ar-tipsen-for-nyborjare/a/GxMeJ6