Finland: Të papunët rrezikojnë karencë (periudhë ndëshkimi / pezullimi, gjatë së cilës një person nuk merr përfitime financiare) që pas shkeljes së parë

Parlamenti ka miratuar ndryshime të reja ligjore që prekin personat e papunë. Sipas ligjit të ri, të papunët mund të marrin karencë që pas shkeljes së parë, nëse nuk kërkojnë punë ose nuk marrin pjesë në shërbime që ndihmojnë punësimin.

Këtë e ka bërë të ditur Institucioni i Sigurimeve Shoqërore (FPA) në një komunikatë për shtyp.

Karenca do të thotë se personi humbet të drejtën për përfitime të papunësisë për një periudhë të caktuar kohe.

Ndryshimet janë iniciuar nga qeveria Orpo dhe synojnë të rrisin përgjegjësinë e të papunëve si dhe ta bëjnë sistemin e sigurimeve shoqërore më nxitës për të kërkuar punë.

Sipas rregullave të reja, nga data 1 mars, nëse një person i papunë humbet një aktivitet pa arsye të pranueshme, ai do të marrë shtatë ditë karencë. Në rast të shkeljeve të përsëritura, për të rifituar të drejtën e përfitimit të papunësisë, personi duhet të punojë ose të marrë pjesë në masa punësimi për të paktën gjashtë javë.

Nëse përfitimi i papunësisë ndërpritet për shkak të karencës ose detyrimit për të qenë në punë, personi i papunë mund të aplikojë për përfitime të tjera, si ndihma e përgjithshme për strehim ose ndihma sociale.

Pjesa bazë e ndihmës sociale, e cila mbulon shpenzime të përditshme si ushqimi dhe rrobat, është aktualisht 587,34 euro në muaj për personat që jetojnë vetëm.

Nga data 1 shkurt, FPA do të ketë të drejtë ta ulë këtë shumë me 20 deri në 40%, nëse personi është në karencë ose ka detyrim për të qenë në punë.

Megjithatë, FPA është e detyruar ta dëgjojë gjithmonë klientin përpara se të vendosë për uljen e ndihmës sociale dhe mund të mos e ulë ndihmën nëse kjo do të rrezikonte jetesën e personit.

Burimi: Yle

Link: https://yle.fi/a/7-10090933