Finlanda propozon 5 mijë euro për çdo foshnjë të porsalindur

Befolkningsförbundet ka propozuar një plan të ri për të rritur lindshmërinë dhe për të nxitur të rinjtë të krijojnë familje më herët. Sipas propozimit, çdo foshnjë e lindur në Finlandë do të përfitojë 5 000 euro nga shteti në një fond të veçantë për bebe.

Paratë nuk do të mund të përdoren menjëherë. Ato do të ruhen dhe investohen deri në momentin kur fëmija të rritet dhe të bëhet vetë prind. Vetëm atëherë personi do të ketë të drejtë t’i tërheqë paratë.

Sipas organizatës, sistemi do të japë rezultat pas 20 deri në 30 vitesh, sepse gjatë kësaj kohe fondi do të vazhdojë të rritet nga investimet.

Organizata beson se kjo nismë mund të sjellë mbi 15 mijë lindje më shumë se sa aktualisht në Finlandë.

Synimi: më shumë familje dhe lindje më të hershme

Sipas Befolkningsförbundet, shumë të rinj po e shtyjnë krijimin e familjes për shkak të pasigurisë ekonomike dhe frikës për të ardhmen.

Fondi synon të japë siguri ekonomike dhe të inkurajojë çiftet, sidomos ata me të ardhura të ulëta, që të kenë fëmijë më herët.

Organizata thotë se fondi do të jetë edhe një mesazh simbolik që tregon se Finlanda po investon te fëmijët dhe te brezat e ardhshëm.

Pse po lindin më pak fëmijë në Finlandë?

Sipas të dhënave të publikuara nga organizata:

• Mbi 80% e rënies së lindjeve lidhet me faktin se më pak njerëz po bëhen prindër për herë të parë.
• Më shumë se gjysma e grave nga 30 deri në 34 vjeç nuk kanë fëmijë.
• Finlandezët po i lindin fëmijët më vonë krahasuar me vendet e tjera nordike.
• Pas moshës 35-vjeçare, numri i lindjeve pothuajse nuk rritet.
• Gjendja ekonomike dhe të ardhurat ndikojnë shumë në vendimin për të krijuar familje.

Reagim ndaj planit të qeverisë

Ky propozim erdhi menjëherë pasi një grup pune i krijuar nga ministrja e sigurisë sociale Sanni Grahn-Laasonen prezantoi një reformë të re për ndihmën e fëmijëve.

Sipas planit të qeverisë, çdo fëmijë do të merrte 100 euro në muaj si ndihmë financiare.

Në të njëjtën kohë do të hiqeshin:

• sistemi aktual ku shuma rritet me numrin e fëmijëve;
• shtesa prej 26 eurosh për fëmijët nën tre vjeç;
• shtesa prej 73,30 eurosh për prindërit e vetëm.

Qeveria synon një sistem më të thjeshtë dhe pa kosto shtesë. Megjithatë, ekspertët e grupit të punës thanë se këto ndryshime nuk pritet të rrisin numrin e lindjeve.

Befolkningsförbundet kritikoi menjëherë reformën, duke thënë se familjet me shumë fëmijë dhe prindërit e vetëm do të dëmtohen nga ndryshimet.

Fokus te fëmija i parë

Eksperti Max Heino, i cili është edhe iniciatori i propozimit për fondin e bebeve, tha se problemi më i madh në Finlandë është se po lindin më pak fëmijë të parë.

Sipas tij, fondi do të ketë rritje të sigurt me kalimin e viteve, sepse periudha e investimit është shumë e gjatë.

Ai llogarit një fitim bruto prej rreth 6% në vit nga investimet.

Heino tha se në rastin më të mirë fondi mund të vetëfinancohet pas një gjenerate, sepse shuma do të vazhdojë të rritet vazhdimisht.

Bonus i përkohshëm për familjet

Organizata pranon se fondi është një zgjidhje afatgjatë dhe nuk i ndihmon menjëherë prindërit që kanë nevojë për para tani.

Për këtë arsye propozohet edhe një bonus i përkohshëm financiar për familjet, i cili do të përdoret deri në momentin kur pagesat nga fondi i madh të fillojnë të funksionojnë.

Çfarë ndodh me ata që nuk bëhen prindër?

Sipas propozimit, nëse një person nuk bëhet prind deri në moshën 45-vjeçare, ai nuk do të mund t’i marrë paratë.

Në këtë rast, fondi do t’i mbajë ato para dhe do t’i përdorë për të financuar fëmijët e rinj që lindin në të ardhmen.

Burimi: YLE

Link: https://yle.fi/a/7-10098415