Finlanda propozon kufi shpejtësie për makinat me goma me thumba (dubbdäck)

Gomat me thumba (dubbdäck) dëmtojnë asfaltin, krijojnë gjurmë në rrugë dhe shpërndajnë grimca në ajër. Për ta ndalur këtë, Finlanda po mendon të vendosë një shpejtësi maksimale të lejuar për makinat që përdorin goma me thumba (dubbdäck), me synimin për të mbrojtur rrugët dhe mjedisin.

Një fushatë e re në vend, me emrin “Renkaat kelin mukaan”  që do të thotë “Gomat e duhura për motin”  kërkon vendosjen e këtij kufiri. Fushata, e cila bashkëpunon me disa institucione shtetërore, dëshiron që qeveria të vendosë një shpejtësi maksimale të veçantë për makinat me goma me thumba (dubbdäck), për të ulur dëmtimin e rrugëve dhe për të inkurajuar përdorimin e gomave normale dimërore pa thumba.

Aktualisht, Finlanda ka rregulla që përcaktojnë periudhat kur lejohet përdorimi i gomave me thumba (dubbdäck)  njësoj si në Suedi por nuk ekziston asnjë kufi shpejtësie për to.

“Problemi është më i madh në pranverë dhe vjeshtë, kur kufiri në autostrada është 120 km/h. Edhe me goma me thumba (dubbdäck) lejohet të ngasësh shpejt, dhe kjo përshpejton dëmtimin e asfaltit,” shpjegon Jouko Lahti, zëdhënës i fushatës.

Sipas Väylävirasto, autoritetit finlandez të rrugëve (i ngjashëm me Trafikverket në Suedi), gomat me thumba (dubbdäck) shkaktojnë shumë më tepër dëme sesa gomat normale, veçanërisht kur rruga është e lagur.

Dëmtimi rritet shumë kur shpejtësia kalon 80 km/h, dhe në rrugët me qarkullim të dendur asfalti dëmtohet shpejt duke krijuar gjurmë të thella. Ky problem është rritur vitet e fundit dhe është bërë një çështje ekonomike për shtetin.

Riparimet kushtojnë gjithnjë e më shumë, borxhi për mirëmbajtjen e rrugëve po shtohet dhe shumë segmente duhet të shtresohen me asfalt të ri shumë më herët se sa ishte planifikuar.

“Sot situata është e paqëndrueshme për rrjetin rrugor dhe për kostot e mirëmbajtjes. Një kufi shpejtësie prej 100 km/h për makinat me goma me thumba (dubbdäck) do të ishte një hap në drejtimin e duhur. Do të zvogëlonte dëmtimin e rrugëve dhe do të nxiste më shumë njerëz të përdorin këto goma,” thotë Lahti për Ilta-Sanomat.

Sipas përkrahësve, një kufi i tillë shpejtësie do të zgjaste jetën e rrugëve, do të ulëte zhurmën dhe ndotjen nga grimcat. Thumbat e gomave (dubbdäck) çajnë asfaltin dhe lëshojnë grimca të vogla që ngrihen në ajër, duke ndikuar si në mjedis, ashtu edhe në shëndetin e njerëzve.

Por kundërshtarët thonë se kjo masë do të zemëronte shumë shoferë, veçanërisht në veriun e vendit, ku gomat me thumba (dubbdäck) janë ende të domosdoshme për sigurinë në rrugët me akull.

Lahti thekson se qëllimi nuk është ndalimi i gomave me thumba (dubbdäck), por përdorimi më i kujdesshëm i tyre.

“Shumë shoferë mund të zgjedhin goma dimërore la thumba, sidomos në pjesën jugore të Finlandës ku rrugët rrallë janë të ngrira. Por për ata që kanë nevojë për goma me thumba (dubbdäck), duhet thjesht të përshtatin shpejtësinë me kushtet e rrugës. Një kufi prej 100 km/h do të ishte një kompromis i arsyeshëm,” shton ai.

Në disa vende evropiane ka rregulla të ngjashme:

Në Austri, makinat me goma me thumba (dubbdäck) mund të ngasin deri në 80 km/h jashtë qyteteve dhe 100 km/h në autostrada.

Në Zvicër, ato lejohen për automjetet nën 3,5 ton nga 1 nëntori deri më 31 mars, por janë gjithmonë të ndaluara në autostrada.

Nëse Finlanda miraton këtë propozim, ajo do të bëhet një nga vendet e para nordike me kufi të veçantë shpejtësie për makinat me goma me thumba (dubbdäck).