Fluturimi me somalezët e dëbuar nga Suedia u anulua

Një fluturim që do të transportonte të paktën 20 shtetas somalezë të dëbuar nga Suedia drejt kryeqytetit të Somalisë, Mogadishu, u anulua të martën në mëngjes. Lajmi bëhet i ditur nga burime të gazetës suedeze Dagens Nyheter (DN).

Sipas raportimeve, arsyeja e anulimit lidhet me tensionet e fundit politike mes dy vendeve. Pak ditë më parë, Ekot zbuloi se rreth 100 milionë krona nga ndihmat suedeze për Somalinë ishin drejtuar në projekte që kanë lidhje të ngushta me kryeministrin somalez. Ky zbulim ka shkaktuar zemërim dhe reagime të forta në Somali.

Për shkak të kësaj situate, autoritetet somaleze kanë vlerësuar se momenti është shumë i ndjeshëm për të pranuar avionin me personat e dëbuar.

Policia suedeze ka konfirmuar në një email dërguar DN se disa urdhra dëbimi nuk kanë mundur të zbatohen, por nuk ka dhënë detaje, duke thënë vetëm se “arsyet nuk mund t’i bëjmë publike”.

As autoritetet somaleze dhe as ambasadori i Somalisë në Suedi nuk kanë dhënë ndonjë koment për ngjarjen.