Gazetari rrezikon dëbimin drejt Iranit: “Mos më dërgoni në një vdekje të sigurt”

Gazetari me bazë në Stokholm, Lavan Mohammadi, rrezikon të dëbohet nga Suedia drejt Iranit, një vendim që sipas tij mund të çojë deri në ekzekutimin e tij. Ai e ka bërë publik shqetësimin përmes një artikulli debati të botuar në gazetën suedeze Expressen, ku u bën thirrje autoriteteve suedeze, veçanërisht Agjencisë së Migracionit, që të rishqyrtojnë vendimin.

Mohammadi ka ardhur në Suedi në vitin 2019, pasi u largua nga pjesa iraniane e Kurdistanit për shkak të angazhimit të tij politik. Aktualisht ai punon si gazetar për kanalin kurd dhe persian të lajmeve Aryen TV.

Në shkrimin e tij, Mohammadi thotë se është e pakuptimtë që të dëbohet drejt një vendi që, sipas tij, “nuk njeh lirinë e shtypit dhe të shprehjes”. Ai paralajmëron se kthimi në Iran do ta vendoste jetën e tij në rrezik serioz.

Sipas Mohammadi-t, autoritetet iraniane e akuzojnë atë për “minim të sigurisë së shtetit”, për shkak të lidhjeve të pretenduara me parti opozitare kurde. Ai thekson se kjo është një metodë e zakonshme e regjimit iranian për të ndëshkuar gazetarët dhe zërat kritikë.

Në fund të artikullit të tij, Mohammadi bën një thirrje të drejtpërdrejtë dhe të fortë:

“Mos më dërgoni drejt një vdekjeje të sigurt në Iran.”