Gjatë festës së Valborgut shpërthejnë disa zjarre, përveç zjarreve tradicionale

Rreziku për zjarre në pyje dhe në sipërfaqe me bar të thatë është shumë i lartë në shumë pjesë të Suedisë gjatë këtyre ditëve të festës së Valborgut. Mediat suedeze raportojnë se tashmë kanë shpërthyer disa zjarre, dhe jo vetëm nga zjarret tradicionale që ndizen nga qytetarët për festë.

Në rajonin e Dalarna-s, zjarrfikësit janë detyruar të ndërhyjnë në disa zjarre në ambiente të hapura. Një nga rastet më serioze ndodhi pranë qytetit Avesta, ku zjarri u përhap në një sipërfaqe prej rreth 2 500 metrash katrorë, sipas radios suedeze P4 Dalarna.

Një tjetër zjarr pyjor shpërtheu pranë Örebro-s gjatë pasdites. Sipas raportimeve të P4 Örebro, shërbimi i emergjencës kërkoi edhe ndalimin e përkohshëm të trafikut hekurudhor në zonë, pasi një zjarr kishte rënë pranë shinave të trenit jashtë Lindesberg-ut.

Raportime për zjarre janë bërë gjithashtu edhe në Svenljunga, Östersund, si dhe në një zonë hekurudhore mes Malmö-s dhe Trelleborg-ut.

Policia dhe autoritetet po paralajmërojnë qytetarët të tregojnë kujdes maksimal, pasi toka dhe bimësia janë shumë të thata dhe zjarret mund të përhapen me shpejtësi.

“Duke parë sa e thatë është toka në këtë zonë, më e mira është të mos ndizet fare zjarr. Ai përhapet shumë lehtë”, tha zëdhënësi i policisë, Mats Thörn, për gazetën Aftonbladet.

Burimi:Omni

Link: https://omni.se/flera-brander-under-valborg-utover-majbrasorna/a/JOn4BP