Hetim për kalime të paligjshme në Aeroportin “Nënë Tereza” / 16 punonjës policie në hetim

16 punonjës të policisë kufitare në Aeroportin “Nënë Tereza” në Tiranë, dyshohet se janë të përfshirë në një skemë korrupsioni për kalimin e personave në mënyrë të jashtëligjshme drejt vendeve të BE-së. 8 prej policëve u është caktuar masa e sigurisë, ndërkohë 8 të tjerët po hetohen në gjendje të lirë. Punonjësit e policisë dyshohen për shpërdorim detyre dhe korrupsion pasiv. Gjykata ka vendosur masën e sigurisë “arrest me burg” për 1 punonjës, “arrest shtëpiak” për 3 të tjerë dhe “detyrim paraqitje në polici” për 4 të tjerë. Prokuroria e Tiranës ka njoftuar se punonjësit e policisë dyshohen për bashkëpunim me pronarin e një agjencie udhëtimesh, i cili u ndalua disa ditë më parë për lëndë narkotike. Sipas Prokurorisë së Tiranës, së paku 200 shtetas kanë kaluar në mënyrë të paligjshme, nga aeroporti i Rinasit drejt vendeve të Bashkimit Evropian, për një periudhë 1 vjeçare. Gjatë hetimit, rezulton se është lejuar edhe kalimi i një të mituri pa prokurën e prindit. Dyshohet se grupi që mundësonte kalimin përfitonte 500 euro nga secili.