Hiqet aplikacioni dhe vendosen rregulla të reja për interesat. Ja çfarë duhet të dini për deklarimin e këtij viti

Agjencia Suedeze e Tatimeve po përgatitet për një periudhë shumë të ngarkuar, pasi deklarimi i të ardhurave hapet më 17 mars. Këtë vit, 232 298 persona në qarkun Gävleborg duhet të bëjnë deklarimin e tyre tatimor.

Në mesin e tyre janë edhe 2 905 persona që do të deklarojnë për herë të parë. Personat që nuk kanë nevojë të bëjnë asnjë ndryshim në deklaratën e tyre duhet ta miratojnë atë në mënyrë digjitale jo më vonë se 31 marsi. Në këtë mënyrë ata mund ta marrin kthimin e taksave që në muajin prill. Afati i fundit për të dorëzuar deklarimin është data 4 maj.

Këtë vit ka edhe disa ndryshime të rëndësishme. Skatteverket ka vendosur të heqë aplikacionin e saj për deklarimin. Përveç kësaj, janë ndryshuar rregullat për zbritjen e interesave për kreditë pa garanci, të quajtura blankolån. Nga ky vit, qytetarët mund të bëjnë zbritje vetëm për gjysmën e kostos së interesit të këtyre kredive. Ndërkohë, kreditë për shtëpi nuk preken nga ky ndryshim dhe vazhdojnë të kenë zbritje të plotë të interesit.

Nëse dikush zbulon një gabim pasi ka dorëzuar deklarimin, është ende e mundur të dërgojë informacion të ri ose të bëjë ndryshime edhe pas datës 4 maj. Megjithatë, autoritetet paralajmërojnë se në këto raste koha e përpunimit të kërkesës do të jetë më e gjatë.

Sipas Anna Formgren, zëdhënëse për deklarimin në Gävleborg, gabimet më të zakonshme që bëjnë qytetarët janë llogaritjet e gabuara ose vendosja e informacionit në rubrikën e gabuar. Këto gabime ndodhin më shpesh kur deklarimi bëhet në letër dhe jo përmes shërbimit digjital në faqen e Skatteverket. Sipas saj, këto gabime bëhen si nga personat që deklarojnë për herë të parë, ashtu edhe nga ata që e kanë bërë këtë për shumë vite.

Një tjetër gjë që shumë njerëz harrojnë të deklarojnë janë të ardhurat nga kriptovalutat. Disa qytetarë nuk janë të sigurt se si duhet t’i raportojnë këto të ardhura.

Për të ndihmuar qytetarët, në faqen e Skatteverket ekziston edhe një chatrobot me emrin “Skatti”, i cili u përgjigjet pyetjeve më të zakonshme rreth deklarimit. Autoriteti rekomandon përdorimin e këtij shërbimi dhe thekson se është gjithmonë i gatshëm të ndihmojë personat që kanë paqartësi gjatë procesit të deklarimit.

Burimi: SVT

Link:https://www.svt.se/nyheter/lokalt/gavleborg/appen-borta-och-nya-ranteregler-detta-galler-for-arets-deklaration