I ftohti i qershorit pritet t’ia lërë vendin vapës për festën e Mesverës (Midsommar) në Suedi

Pas një periudhe me temperatura të ulëta dhe mot të paqëndrueshëm, Suedia mund të përjetojë një ndryshim të madh të motit pikërisht në fundjavën e festës së Mesverës (Midsommar).

Sipas gazetës suedeze Dagens Nyheter (DN), fundjava e Mesverës pritet të jetë e ngrohtë në pjesën më të madhe të vendit. Në jug të Suedisë temperaturat mund të arrijnë nga 20 deri në 25 gradë Celsius gjatë festimeve  tradicionale të Mesverës, ndërsa të shtunën në disa zona priten temperatura tipike të verës së nxehtë, që mund të shkojnë deri në 30 gradë Celsius.

Megjithatë, java e Midsommar do të nisë me mot të ftohtë. Një sistem me presion të ulët atmosferik do të vendoset mbi Detin Baltik, duke sjellë temperatura më të ulëta se zakonisht për këtë periudhë të vitit.

Meteorologu i Institutit Suedez të Meteorologjisë dhe Hidrologjisë (SMHI), Magnus Nilsson Sangrud, tha për gazetën Mitt i Stockholm se moti do të jetë jashtëzakonisht i ftohtë për stinën.

“Duhet të jemi të lumtur që Midsommar nuk festohet të hënën”, tha ai, duke iu referuar temperaturave të ulëta që priten në fillim të javës.

Edhe në ishullin Gotland priten reshje shiu gjatë ditëve të ardhshme. Megjithatë, sipas meteorologut tjetër të SMHI-së, Max Lindberg Stoltz, moti do të përmirësohet gradualisht ndërsa afrohet fundjava.

Ai tha për gazetën Helagotland se, sipas parashikimeve aktuale, gjatë gjithë ditës së Midsommar nuk priten reshje shiu.

“Sipas asaj që shohim tani, gjatë gjithë ditës së Mesverës do të jetë pa reshje”, u shpreh ai.

Parashikimet e fundit tregojnë se, pas një fillimi jave të ftohtë dhe me shi në disa zona, suedezët mund të shijojnë një fundjavë të ngrohtë dhe me mot më të qëndrueshëm gjatë një prej festave më të rëndësishme të verës.

Burimi:DN/Mitti/Helagotland

Link: https://www.dn.se/sverige/smhi-uppemot-30-grader-i-midsommar/

https://www.mitti.se/nyheter/sa-blir-vadret-pa-midsommar–kan-bli-pangvader-6.3.371185.c7e0fa93c2

https://www.helagotland.se/nyheter/gotland/artikel/uppehall-och-runt-20-grader-pa-midsommar/rxqp92yj