Inflacioni në Suedi arrin 2.8% në qershor. Çmimet e udhëtimeve dhe makinave rriten ndjeshëm

Inflacioni në Suedi u rrit në 2.8% gjatë muajit qershor, nga 2.3% që ishte në maj. Kjo është ajo që tregon raporti më i fundit nga Enti Suedez i Statistikave (SCB). Megjithatë, shifra është pak më e ulët se ajo që ishte njoftuar fillimisht (2.9%).

Sipas SCB-së, rritja më e madhe e çmimeve u vu re tek udhëtimet me paketa turistike dhe qiraja e makinave. Vetëm nga maji në qershor, çmimi i udhëtimeve u rrit me mbi 31%, ndërsa marrja me qira e makinave u bë mbi 30% më e shtrenjtë.

“Shumë mallra dhe shërbime janë bërë më të shtrenjta këtë muaj,” tha Filip Hellberg, statistikani i çmimeve në SCB.

Edhe ushqimet vazhduan të ndikojnë në rritjen e përgjithshme të çmimeve. Nga ana tjetër, rënia e çmimeve të energjisë elektrike ndihmoi që inflacioni të mos rritej edhe më shumë.

Ky zhvillim tregon se kostot për konsumatorët po vazhdojnë të rriten, veçanërisht gjatë verës kur kërkesa për udhëtime dhe shërbime është më e lartë.