Ja kush janë komunat që nuk do të marrin pjesë në takimin për “kthimin vullnetar” të emigrantëve në Östergötland.

Takimi i propozuar nga qeveria suedeze për të diskutuar kthimin vullnetar të emigrantëve ka krijuar ndasi të mëdha në mesin e komunave të rajonit Östergötland. Disa prej tyre e kanë refuzuar ftesën, ndërsa të tjera pranojnë të marrin pjesë për të dëgjuar më shumë.

Të enjten, Mark Henriksson (M), kryetari i këshillit komunal të Motala-s, njoftoi për SVT se komuna e tij do të marrë pjesë në takim.

“Kam ndjekur reagimet nga komunat e tjera që nuk duan ta mbajnë takimin dhe jam befasuar. Mendoj se në Motala duhet ta marrim informacionin që ofrohet dhe të kemi një diskutim. Do të ishte e çuditshme ndryshe,” tha ai për SVT Nyheter Öst.

Mjölby ndryshon qëndrim

Në anën tjetër, disa komuna të udhëhequra nga të djathtët (Moderaterna) kanë zgjedhur të mos marrin pjesë. Këtu përfshihen Kinda dhe Vadstena.

Edhe Mjölby, e cila fillimisht kishte thënë se do të merrte pjesë, ndryshoi vendim gjatë ditës së enjte. Në një komunikatë për shtyp, kryetarja e këshillit komunal, Cecilia Burenby (S), shpjegon:

“Pas shqyrtimit të mëtejshëm, kemi vendosur të mos e pranojmë vizitën. Duam të theksojmë qëndrimin tonë ne duam që Mjölby të jetë një shoqëri e bazuar në përfshirje dhe besim. Njerëzit që kanë ardhur këtu dhe kanë marrë leje qëndrimi janë pjesë e komunitetit tonë.”

Komuna të tjera që refuzojnë

Edhe Finspång ka njoftuar se nuk do të marrë pjesë, gjë që u raportua më herët nga SVT Nyheter Öst.

Ndërkohë, Valdemarsvik ende nuk ka marrë vendim përfundimtar, por përfaqësuesi i saj Per Hollertz (M) e quan këtë çështje të padramatike.

“Nuk e kemi trajtuar ende, por nuk shoh ndonjë problem të marrim pjesë në një bisedë për këto çështje,”  tha ai.

Ja si qëndrojnë komunat e Östergötland ndaj takimit për kthimin vullnetar:

• Kinda: Jo
• Norrköping: Jo
• Linköping: Jo
• Finspång: Jo
• Motala: Po
• Mjölby: Jo
• Ödeshög: E paqartë
• Valdemarsvik: Ende pa vendim
• Söderköping: Jo
• Boxholm: Jo
• Åtvidaberg: E paqartë
• Ydre: Jo
• Vadstena: Jo

Burimi: SVT