Janari shumë më i ftohtë se zakonisht në të gjithë Suedinë

Po ndjen të ftohtë? Kjo është normale. E gjithë Suedia po përjeton temperatura shumë më të ulëta se zakonisht për muajin janar. Sipas Institutit Meteorologjik Suedez (SMHI), i ftohti pritet të vazhdojë të paktën edhe një javë.

Viti 2026 ka nisur me temperatura dukshëm nën mesataren e janarit. Në jug të Suedisë, temperaturat janë përgjithësisht dy deri në tre gradë më të ulëta se normalja, thotë Johan Widsten, meteorolog në SMHI.

Në veri të vendit,  është edhe më i fortë. Në zonën e Tornedalen-it, temperaturat janë deri në tetë gradë më të ulëta se normalja.

“Kjo dallon qartë nga ajo që jemi mësuar”, thotë Johan Widsten.

Sipas meteorologut të TV4, janari i vitit 2026 është në rrugë për t’u bërë janari më i ftohtë në më shumë se 20 vjet. Edhe Johan Widsten është dakord me këtë vlerësim, edhe pse janari i vitit 2010 ishte edhe më i ftohtë në jug të Suedisë krahasuar me këtë vit. Në vitin 2010, temperaturat në veriun më të largët të vendit ishin më normale.

“Duke qenë se këtë vit është jashtëzakonisht ftohtë në veri, ndoshta ky janar do të jetë më i ftohti për vendin në tërësi”, thotë Widsten.

Presion i lartë sjell të ftohtë të qëndrueshëm

Sipas SMHI-së, i ftohti do të vazhdojë të paktën edhe një javë. Arsyeja është një situatë e qëndrueshme me presion të lartë atmosferik që qëndron mbi Skandinavi dhe ndikon motin.

Kjo situatë bën që të mos ketë reshje bore në ditët në vijim.

“Zakonisht, moti në këto gjerësi ndikohet nga presione të ulëta që lëvizin mbi Atlantik. Tani kemi një presion të lartë të palëvizshëm, i cili i detyron presionet e ulëta të kalojnë ose në veri, ose në jug drejt kontinentit”, shpjegon Johan Widsten.

Fundjavë me diell në jug, më gri në veri

E shtuna ka gjasa të jetë një ditë e kthjellët dhe e ftohtë dimërore në jug të Suedisë, veçanërisht në Uppland dhe në zonën e Mälardalen-it.

Në veri të Suedisë, fundjava pritet të jetë më e zymtë.

“ Atje, vranësirat do të mbeten dhe do të jenë mjaft të dendura”, thotë Widsten.

Parashikimi: deri në 19 gradë nën zero në Stokholm

Sipas parashikimit të SMHI-së, Stokholmi mund të përjetojë temperatura deri në 19 gradë nën zero natën drejt së mërkurës javën e ardhshme.

Megjithatë, ky parashikim nuk është plotësisht i sigurt. Temperatura varet nga sa me re do të jetë moti. Parashikimi i vranësirave gjatë dimrit, në situata të tilla me presion të lartë, është shumë i vështirë.

“Kushtet për të pasur të ftohtë ekzistojnë. Ajri mbi ne është i ftohtë. Por nëse ka re të dendura që mbulojnë qiellin, ato mund ta zbusin ndjeshëm të ftohtin”, përfundon Johan Widsten.

Burimi: Expressen

Link: https://www.expressen.se/nyheter/vader/januari-kallare-an-normalt-smhi-sticker-ut/