Johan Forssell: Të rinjtë e dëbuar mund të lejohen të qëndrojnë në Suedi

Ministri suedez i Migracionit, Johan Forssell, ka deklaruar se qeveria po kërkon një zgjidhje për të rinjtë që kanë marrë vendim për dëbim nga Suedia, edhe pse sipas ndryshimeve të reja në ligj ata do të kishin të drejtë të qëndronin në vend.

Sipas Aftonbladet, qeveria suedeze prej kohësh po merret me problemin e familjeve emigrante, ku prindërit kanë marrë leje qëndrimi të përhershme, ndërsa fëmijët e tyre të mitur vetëm leje të përkohshme. Kjo ka bërë që disa të rinj të përballen me dëbim, edhe pse familjet e tyre lejohen të jetojnë në Suedi.

Forssell tha se nuk ka ende shifra të sakta se sa persona preken nga kjo situatë, por theksoi se për ata që janë të përfshirë bëhet fjalë për një çështje shumë të rëndësishme që ndikon drejtpërdrejt në jetën e tyre.

Ai u shpreh se sidomos të rinjtë që gjatë qëndrimit në Suedi kanë studiuar, kanë punuar dhe nuk kanë kryer vepra penale, duhet të kenë mundësinë për të ndërtuar një të ardhme të qëndrueshme në vend.

“Duhet t’u jepet një shans i drejtë për të krijuar një jetë afatgjatë në Suedi”, tha ministri suedez.

Qeveria suedeze pritet që së shpejti të paraqesë një zgjidhje konkrete për këtë problem.

Burimi: Aftonbladet/Omni/TT

Link: https://tt.omni.se/forssell-vill-se-over-beslutade-tonarsutvisningar/a/rrz1pA

https://www.aftonbladet.se/nyheter/a/5p898z/forssell-oppnar-for-att-utvisade-unga-ska-fa-stanna-kanns-fel-i-hjartat