Kalim semafori me dritë të verdhë gjoba më e ulët, por rrezik të humbasësh patentën.

Gjobat për shkeljet në trafik janë ulur këtë vit, por shoferët duhet të kenë kujdes: kalimi me dritë të verdhë mund t’ju kushtojë lejen e drejtimit.

Në fillim të vitit, Prokuroria rishikoi gjobat në rregulloren e trafikut. Për shembull, gjoba për kalim me dritë të verdhë u ul nga 3000 në 2000 korona. Megjithatë, kjo nuk do të thotë se shoferi shpëton pa pasoja. Nëse ndodh një shkelje e tillë, ekziston rreziku i heqjes së patentës.

“Shumë njerëz mendojnë se drita e verdhë do të thotë të shtosh shpejtësinë për të kaluar, por pikërisht atëherë mund të humbasësh patentën”, shpjegon instruktori i autoshkollës Tobias Tornéus për Sveriges Radio P4.

Nëse policia ju kap në flagrancë, rasti raportohet tek Autoriteti i Transportit, i cili vendos për heqjen e lejes së drejtimit.

“Edhe drita e verdhë sot nënkupton STOP, prandaj është e ndaluar të shpejtosh për të kaluar para se të bëhet e kuqe”, thotë komisari i policisë Erling Andersson.

Shumë shoferë e gjejnë të paqartë ligjin dhe nuk dinë nëse duhet të ndalen menjëherë apo të vazhdojnë. Instruktori Tornéus jep një këshillë të thjeshtë:

“Nëse drita e verdhë ju zë papritur, mos frenoni fort, por vazhdoni të kaloni. Nëse e shihni që po ndizet dhe keni mundësi të ndaloni në mënyrë të sigurt, atëherë ndaloni”, thotë ai për P4 Sjuhärad.

Sipas rregullores së trafikut, shoferi duhet të ndalet në dritë të verdhë nëse kjo mund të bëhet pa rrezik. Vendimin nëse shkelja justifikohet apo jo e merr polici që raporton rastin.

“Nuk lejohet të kalosh në të kuqe, dhe është e njëjta gjë me dritën e verdhë. Shumë shpesh kjo përfundon me heqjen e patentës”, thekson Andersson.