Kaos me votat shqetëson votuesit: “Është bërë një rrëmujë e madhe”

Votuesit në Suedi janë të shqetësuar për fatin e votave të tyre, pasi Autoriteti Suedez i Zgjedhjeve (Valmyndigheten) njoftoi se mijëra vota të hedhura paraprakisht janë regjistruar gabimisht.

Për këtë situatë kanë folur disa votues me gazetën Aftonbladet, duke shprehur shqetësimin se votat e tyre mund të mos vlejnë.

Mes tyre është edhe Marianne Bergman. Ajo dhe bashkëshorti i saj janë dy nga rreth 1,4 milionë personat që kanë zgjedhur të votojnë paraprakisht.

Tani, pas problemit të njoftuar nga autoritetet, çifti ka frikë se votat e tyre mund të shpallen të pavlefshme.

“Është bërë një rrëmujë e madhe. Kjo nuk është aspak normale”, thotë Marianne Bergman.

Autoriteti Zgjedhor jep paralajmërim

Pas zbulimit të problemit, Valmyndigheten u ka bërë një paralajmërim të gjithë personave që kanë votuar paraprakisht.

Autoriteti u kërkon atyre të mos votojnë përsëri paraprakisht, pasi nëse një person e bën këtë, të gjitha votat e tij të hedhura paraprakisht do të bëhen të pavlefshme.

Megjithatë, ekziston mundësia që votuesit ta ndryshojnë votën e tyre. Për këtë, ata mund të votojnë në qendrën e tyre të zakonshme të votimit ditën e zgjedhjeve, më 13 shtator.

Në këtë mënyrë, votuesi mund të ndryshojë zgjedhjen që ka bërë më herët, pa rrezikuar që vota të bëhet e pavlefshme.

Burimi:Aftonbladet

Link:https://www.aftonbladet.se/nyheter/a/q6x70g/valet-2026-kaos-med-fortidsroster-valjarna-oroliga