Kaos në trafik: Përplasje masive në E18 dhe E4 – Të paktën 20 të plagosur

Reshjet e dendura të borës kanë shkaktuar aksidente të rënda në autostradat E18 dhe E4, duke bllokuar tërësisht trafikun. Sipas Policisë Suedeze, në aksidentin në E18 janë përfshirë rreth 50 automjete, ndërsa në E4 situata është gjithashtu kritike.

Spitali Akademik i Uppsala-s ka konfirmuar se të paktën 20 persona janë dërguar për trajtim mjekësor. Ndërkohë, Policia ka paralajmëruar për sjellje të rrezikshme të shoferëve që po përpiqen të kthehen dhe të lëvizin kundër trafikut në E4, duke rritur rrezikun e aksidenteve të tjera.

“Trafiku është devijuar dhe po punojmë intensivisht për të zgjidhur situatën. Shoferët duhet të ndjekin udhëzimet dhe të tregojnë kujdes të madh,” njofton Policia.

Lidhur me situatën, ministri i Infrastrukturës, Andreas Carlson, ka reaguar përmes një postimi në X:
“Qeveria po ndjek nga afër zhvillimet dhe është në kontakt të vazhdueshëm me autoritetet përkatëse. I bëj thirrje të gjithëve të respektojnë udhëzimet dhe të udhëtojnë me kujdes.”

Ndërkohë, Instituti Suedez i Meteorologjisë dhe Hidrologjisë (SMHI) kishte lëshuar më herët një paralajmërim të verdhë për reshje të dendura bore në rajonin e Uppsala-s.

“Planifikoni më shumë kohë për udhëtimin dhe përshtatni shpejtësinë me kushtet e rrugës,” thuhet në njoftimin e SMHI-së.

Autoritetet u bëjnë thirrje qytetarëve të shmangin udhëtimet e panevojshme dhe të informohen rregullisht mbi zhvillimet e trafikut.