Këtë vit, 32 persona humben jetën në punë.

32 punonjës kanë humbur jetën në aksidente të ndodhura në vendin e punës në Suedi që prej fillimit të këtij viti, raporton Dagens Nyheter. Ky bilanc i rëndë sinjalizon një përkeqësim në nivelin e sigurisë në punë, një shqetësim ky që ka ngritur alarmin te autoritetet përgjegjëse.

Lars Lööw, drejtori i përgjithshëm i Autoritetit të Sigurisë dhe Shëndetit në Punë (Arbetsmiljöverket), e pranon se përmirësimi në këtë fushë ka ngecur. “Nuk kemi arritur të hedhim hapin e radhës drejt përmirësimit të sigurisë,” deklaron Lööw për Dagens Nyheter. Sipas tij, është thelbësore të shtohet niveli i njohurive dhe stimujve për respektimin e rregullave të sigurisë, por ai nënvizon se një pjesë e punëdhënësve nuk i respektojnë këto rregulla për përfitime personale, duke rrezikuar jetën e punonjësve.

Aksidentet më tragjike përfshijnë goditjet dhe rrëzimet në sektorin e ndërtimit, transportit dhe industrisë. Ndër rajonet me numrin më të lartë të viktimave dallohen Norrbotten dhe Västra Götaland, ku incidenca e aksidenteve fatale ka qenë veçanërisht e lartë.

Ky bilanc i rëndë thekson nevojën urgjente për masa më efektive që do të rrisin sigurinë në vendet e punës në Suedi dhe të parandalojnë humbjet e tjera tragjike të jetës njerëzore.