Kivra prezanton mjetin e vet të identifikimit digjital, alternativë ndaj Bank-ID.

Kompania suedeze Kivra, e njohur për kutinë postare digjitale që përdorin miliona qytetarë, ka njoftuar se do të prezantojë një mënyrë të re për identifikim digjital, të quajtur Kivraid. Ky shërbim pritet të lançohet gjatë vitit të ardhshëm dhe do të jetë një alternativë ndaj Bank-ID, mjeti më i përdorur sot për hyrje në shërbime digjitale në Suedi.

Sipas Kivra, arsyeja pas këtij zhvillimi është një iniciativë e Bashkimit Evropian që synon të krijojë një “portofol digjital identiteti” një mënyrë më e sigurt dhe më personale për të ruajtur dhe përdorur të dhënat tona në internet.

“Qëllimi është që qytetarët të kenë më shumë kontroll mbi informacionin e tyre dhe të kryejnë veprime të sigurta nëpër kufij,” thuhet në njoftimin për shtyp nga Kivra.

Fillimisht, Kivraid do të përdoret për t’u futur në vetë shërbimin e Kivra-s, por në të ardhmen pritet të ofrohet edhe për shërbime të tjera publike dhe private.

Ky hap shihet si një përpjekje për të rritur konkurrencën në tregun e identifikimit digjital dhe për të forcuar sigurinë dhe privatësinë në shërbimet online.