Komuna e Östersundit mohon thashethemet për ujin e ndotur: “Nuk ka asnjë rrezik”

Komuna e Östersundit është përballur me një valë telefonatash shqetësuese këtë mëngjes, pasi thashethemet për ujin e pijshëm të ndotur kanë përhapur panik mes qytetarëve. Dyshimet për një parazit të dëmshëm, cryptosporide, që mund të shkaktonte diarre, bënë që shumë banorë të shqetësohen dhe të kërkojnë informacion.

Megjithatë, autoritetet e komunës kanë mohuar këto pretendime dhe kanë siguruar publikun se nuk ka asnjë arsye për shqetësim.

Kristina Kenning, shefe e shërbimeve ujore në komunën e Östersundit, konfirmoi se analiza e ujit tregon se gjithçka është brenda normave të sigurisë. “Nuk ka asnjë të vërtetë në këto thashetheme. Nuk ka ndodhur asnjë problem me ujin. Nuk kemi asnjë shenjë që të tregojë shqetësime,” tha Kenning për Östersunds-Posten.

Për të adresuar shpërndarjen e informacionit të rremë, komuna ka njoftuar se do të bëjë kallëzim penal dhe gjithashtu do të raportojë çështjen në Shërbimin e Sigurisë Suedez (Säpo).

Në një deklaratë të publikuar në faqen e komunës, drejtori i komunës, Anders Wennerberg, theksoi: “Këto janë informacione të rreme dhe i shohim me shumë seriozitet. Përhapja e këtij informacioni mund të shkaktojë panik dhe mund të ndikojë në funksionet e përditshme të shoqërisë.”

Komuna ka kërkuar gjithashtu që qytetarët të qëndrojnë të qetë dhe të kërkojnë informacion të saktë nga burime të besueshme.