Kontroll i ri për plehrat në Suedi, familjet që ndajnë gabim do të gjobiten.

Problemet me ndarjen e plehrave vazhdojnë në Suedi, edhe pse autoritetet prej vitesh kanë kërkuar që njerëzit të jenë më të kujdesshëm.

Agjencia Suedeze e Mbrojtjes së Natyrës (Naturvårdsverket) ka paralajmëruar se familjet duhet të mësojnë të hedhin plehrat në koshin e duhur.

“Është shumë e rëndësishme që të përmirësojmë ndarjen e mbeturinave dhe të rrisim riciklimin. Suedia rrezikon gjobë nga BE, sepse nuk duket se do t’i arrijmë objektivat deri në vitin 2025,” tha vitin e kaluar zyrtarja Milla Sundström për gazetën SvD.

Sipas Agjencisë, një e treta e mbeturinave të zakonshme përbëhet nga mbetje ushqimore, të cilat mund të përdoreshin për prodhimin e biogazit dhe plehut organik.

Teknologji e re për kontroll

Megjithë paralajmërimet, situata nuk është përmirësuar. Komunat suedeze paguajnë çdo vit miliona korona për shkak të ndarjes së gabuar të plehrave.

Tani po testohet një metodë e re për ta zgjidhur problemin. Sipas TV4, bëhet fjalë për një kamerë inteligjente me inteligjencë artificiale (AI) që do të kontrollojë koshat e plehrave të familjeve.

“Kjo është një teknologji revolucionare, e para e këtij lloji jo vetëm në Suedi, por në të gjithë botën,” tha Jens Söderman, drejtues i projektit në komunën e Östersund.

Gjoba deri në 300 korona

Projekti do të nisë pikërisht në Östersund. Një kamerë e avancuar AI do të vendoset në kamionin e plehrave dhe do të reagojë nëse zbulon që në kosh janë hedhur plehra të gabuara.

Pamjet do të ruhen dhe do të kontrollohen nga shoferët. Familjet që kapen duke ndarë gabim do të marrin fillimisht një paralajmërim. Nëse nuk përmirësohen, do të gjobiten.

“Gjoba do të jetë rreth 200 deri në 300 korona,” shpjegon Jens Söderman.

Sistemi i ri po vihet në zbatim

Komuna e Östersund kishte njoftuar që në pranverë se sistemi i ri me AI do të vihej në përdorim. Ajo ka forcuar tashmë kontrollin e ndarjes së mbeturinave, dhe mijëra banorë që kanë ndarë gabim janë gjobitur, raportoi P4 Jämtland në maj.

Me modelin e ri të AI-së, pritet që edhe më shumë familje të gjobiten, pasi teknologjia është shumë më e saktë se kontrolli manual që përdorej më parë.

“Fotot do të merren automatikisht dhe do të ruhen në kompjuter. Së shpejti do ta fusim këtë sistem në përdorim,” tha Peter Lindroth, punonjës mjedisor në komunën e Östersund.