Kontrolle më të ashpra ndaj të papunëve në Suedi, raportohen më shumë persona.

Shërbimi Suedez i Punësimit, Arbetsförmedlingen, ka shtuar kontrollet ndaj personave të papunë. Sipas statistikave të reja të publikuara nga Ekot, shumë më tepër njerëz po raportohen sepse nuk kanë kërkuar punë jashtë zonës ku jetojnë ose vetëm në profesionet që preferojnë.

Numri i njoftimeve të dërguara tek fondet e sigurimit të papunësisë, të njohura si “a-kassa”, është rritur ndjeshëm. Në muajin dhjetor ishin rreth 8 mijë raste, ndërsa në mars numri ka arritur në afro 14 mijë.

Po ashtu është rritur shumë edhe numri i sanksioneve ndaj personave të regjistruar në programe pune. Vendimet për paralajmërime ose pezullim të përfitimeve ekonomike kanë kaluar nga pak më shumë se 100 raste në dhjetor në mbi 3 mijë raste në mars.

Qeveria suedeze i ka kërkuar Arbetsförmedlingen që të motivojë më shumë të papunë të zhvendosen në vende ku ka punë dhe të ndryshojnë profesion nëse është e nevojshme. Autoritetet mund të bëjnë përjashtime për personat që kanë më shumë mundësi të gjejnë punë shpejt, por në shumicën e rasteve të papunët nuk lejohen ta kufizojnë kërkimin e punës vetëm në zonën ku jetojnë apo vetëm në profesionin e tyre të mëparshëm.

Drejtoresha e përgjithshme e Arbetsförmedlingen, Maria Hemström Hemmingsson, tha se institucioni tani po e zbaton detyrën më qartë dhe më rreptë.

“Ata duhet të kërkojnë aktivisht punë të përshtatshme, edhe jashtë qytetit ku jetojnë, madje edhe në profesione ku nuk kanë punuar më parë”, u shpreh ajo.

Megjithatë, ekspertët nuk janë të bindur se rregullat më të ashpra do ta ulin papunësinë. Sipas Annika Sundén, zhvendosja për punë mund të ketë një ndikim të vogël, por problemi kryesor mbetet mungesa e aftësive që kërkohen nga punëdhënësit.

Ajo tha se edhe nëse të gjithë të papunët në Malmö do të zhvendoseshin në Västerbotten, kjo nuk do të thotë se do të gjenin automatikisht punë, pasi shumë prej tyre nuk kanë kompetencat që kërkon tregu i punës.

Burimi:Sverigesradio/Ekot

Link: https://www.sverigesradio.se/artikel/arbetsformedlingen-skarper-kontrollen-av-arbetslosa