Kontrollet e rrepta nga Skatteverket. Shumë persona rrezikojnë të humbasin mijëra korona nga zbritja për udhëtim.

Shumë qytetarë në Suedi rrezikojnë të humbasin mijëra krona në deklaratën e tatimit. Arsyeja është se shumë persona që shkojnë në punë me makinë po frikësohen të kërkojnë zbritjen për udhëtim, edhe pse sipas rregullave kanë të drejtë ta bëjnë këtë.

Deklarata e vitit 2026, që ka të bëjë me të ardhurat e vitit 2025, tashmë ka filluar. Por shumë persona që udhëtojnë çdo ditë me makinë për në punë mund të humbasin para që në fakt u takojnë. Zbritja për udhëtim këtë vit është në vitin e fundit me kufirin aktual të shumës. Megjithatë, shumë njerëz po zgjedhin të mos kërkojnë fare këtë zbritje.

Sipas analistes së Skatteverket, Karin Bolin, një arsye është se shumë persona nuk i njohin mirë rregullat.

“Personat që nuk kanë shumë përvojë me zbritjen për udhëtim shpesh ndihen të pasigurt për rregullat. Ata dëgjojnë përvojat e kolegëve të tyre dhe ndikohen nga ato”, thotë ajo.

Gjatë viteve të fundit, Skatteverket ka shtuar kontrollet ndaj personave që dyshohet se kanë bërë zbritje të gabuara për udhëtim në deklaratë. Autoriteti kontrollon më shumë se më parë dhe veçanërisht i kushton vëmendje personave që përdorin makinë për të shkuar në punë dhe kërkojnë këtë zbritje.

Tani përdoret edhe një metodë e re e automatizuar që ndihmon në zbulimin e mashtrimeve. Kjo e bën më të lehtë për autoritetin të zbulojë zbritjet e rreme. Nga personat që janë kontrolluar, pesë nga gjashtë kanë marrë refuzim për zbritjen.

Kjo ka ndikuar edhe në vendet e punës. Kur një person kontrollohet nga Skatteverket, lajmi përhapet shpejt te kolegët. Si rezultat, shumë prej tyre vendosin të mos kërkojnë zbritjen vitin tjetër nga frika se mund të kontrollohen.

Sipas ekspertëve, ky është një gabim i madh. Shumë persona nuk kërkojnë fare zbritjen, edhe pse sipas rregullave kanë të drejtë për të.

Kur ke të drejtë për zbritjen e udhëtimit

Për të marrë zbritjen për udhëtim me makinë, duhet të plotësohen disa kushte.

Së pari, distanca mes shtëpisë dhe vendit të punës duhet të jetë të paktën 5 kilometra.

Së dyti, udhëtimi me makinë duhet të kursejë zakonisht të paktën dy orë në ditë krahasuar me transportin publik.

Nëse këto kushte plotësohen, personi mund të bëjë zbritje prej 25 krona për çdo mil (10 kilometra) që udhëton për në punë.

Por zbritja vlen vetëm për pjesën që kalon shumën 11 000 korona në vit.

Nëse dikush përdor makinë të kompanisë (förmånsbil), atëherë vlejnë rregulla të tjera. Në këtë rast mund të zbriten:

12 korona për mil për makinë me benzinë ose naftë

9,50 korona për mil për makinë elektrike.

Skatteverket mund të kërkojë edhe prova për udhëtimet që janë bërë. Për shembull mund të kërkohet një ditar i udhëtimeve (körjournal), dokumente të servisit ku shihet kilometrazhi i makinës, ose ekstrakte bankare që tregojnë pagesat për karburant.

Personat që janë të pasigurt mund të përdorin edhe një kalkulator në faqen e Skatteverket. Aty mund të vendosin të dhënat e tyre dhe të shohin nëse kanë të drejtë për zbritjen.

Kontrolle më të shpeshta nga autoritetet

Është shumë e rëndësishme që të gjitha të dhënat në deklaratë të jenë të sakta. Skatteverket mund të kërkojë dokumente për të kontrolluar nëse udhëtimet janë bërë vërtet.

Autoriteti mund të kërkojë kuponë të karburantit ose ditar të udhëtimeve. Gjithashtu mund të pyesë për adresën e vendit të punës, sa larg është nga shtëpia dhe sa ditë personi ka qenë fizikisht në punë.

Gjatë viteve të fundit janë zbuluar gjithnjë e më shumë raste me zbritje të gabuara për udhëtim dhe shumë deklarata janë korrigjuar.

Kjo do të thotë se personat që mashtrojnë mund të detyrohen të paguajnë paratë mbrapsht. Por për ata që deklarojnë saktë nuk ka asnjë arsye për t’u shqetësuar.

Nëse një person i plotëson rregullat për zbritjen e udhëtimit, atëherë ai ka të drejtë ta përfshijë këtë zbritje në deklaratën e tij.

Ky vit është gjithashtu viti i fundit kur zbritja bëhet për shumën që kalon 11 000 korona. Nga deklarata e vitit të ardhshëm kufiri do të rritet në 15 000 korona.

Burimi: Carup.se

Link: https://carup.se/skatteverkets-fuskjakt-som-skrammer-manga/#google_vignette