Kritika të ashpra nga Forumi i të Rinjve Liberalë (LUF): Propizimi i ligjeve të reja ndanë të huajt nga suedezët.

Qeveria suedeze po shqyrton mundësinë që më shumë leje qëndrimi të refuzohen ose të anulohen për shkak të mungesës së sjelljes së mirë dhe ndershmërisë.

Ky është propozimi i një hetimi të ri, por ai është pritur me kritika të ashpra nga Forumi i të Rinjve Liberalë (LUF), i cili e ka cilësuar si një “shaka të keqe të prillit”.

Rikthimi i kërkesave për sjellje të mirë

Ministri i Migracionit, Johan Forssell (M), ka pranuar sot raportin e quajtur “hetimi mbi sjelljen”. Sipas një njoftimi të qeverisë, propozimi sugjeron që në Ligjin për të Huajt të rikthehet një kërkesë bazë për sjellje të mirë (vandel).

Një sjellje e pahijshme, sipas raportit, mund të përfshijë:

• Borxhe ndaj individëve ose shtetit,

• Mosrespektim të vendimeve të autoriteteve,

• Kryerjen e veprave të vogla penale në mënyrë të përsëritur,

• Mashtrime me sistemet e mirëqenies,

• Rrezik për sigurinë publike.

Një pikë kyçe në Marrëveshjen e Tidös

Zëdhënësi i politikës së emigracionit të Demokratëve të Suedisë, Ludvig Aspling, e mbështet propozimin, duke thënë se ligjet suedeze për të huajt kanë pasur shumë boshllëqe, por se tani ato po mbyllen.

– Kjo i jep Migrationsverket (Agjencisë së emigracionit) mundësinë për të vlerësuar më gjerësisht mënyrën e jetesës së të huajve dhe për të marrë vendime për dëbim, tha ai.

Raporti propozon gjithashtu që lejet e qëndrimit të refuzohen ose të anulohen nëse dikush bën deklarata që kërcënojnë rendin publik ose sigurinë, apo nëse deklaratat janë të ndëshkueshme me ligj.

– Ne po krijojmë mundësinë për të anuluar lejet e qëndrimit për ata që kanë kryer krime, edhe nëse çështja e dëbimit nuk është shqyrtuar nga gjykata. Po ashtu, po heqim pengesën ligjore që ndalon dëbimin e personave që kanë jetuar më shumë se katër vjet në Suedi, tha Aspling.

Kritika të forta nga LUF: “Krijon dy sisteme ligjore”

Forumi i të Rinjve Liberalë (LUF) e ka kundërshtuar ashpër propozimin, duke thënë se ai krijon një sistem të ndarë ligjor për të huajt dhe një tjetër për suedezët.

– Ky propozim është një shaka e keqe e prillit. Ai krijon një shoqëri paralele, ku ata me leje qëndrimi kanë shumë më pak të drejta sesa suedezët. Liberalët duhet ta hedhin këtë propozim në kosh kur të vijë në parlament, tha kryetari i LUF-it, Anton Holmlund.

Një nga shqetësimet më të mëdha të LUF-it është se ky ligj mund të përdoret për të dëbuar njerëz vetëm për shkak të deklaratave të tyre publike, si kritikat ndaj autoriteteve.

– Nëse një person ndjek ligjin dhe bën më të mirën e tij, ai nuk duhet të ketë më pak të drejta vetëm sepse ka lindur diku tjetër. Është kaq e thjeshtë, tha Holmlund.

Nëse miratohen, ndryshimet ligjore pritet të hyjnë në fuqi më 1 korrik 2026.