Kritikë e ashpër nga JO ndaj qendrës së ndalimit në Mölndal: “Pasoja të papranueshme”

Një ngjarje shumë e rëndë ka ndodhur në qendrën e ndalimit të Agjencisë së Migracionit në Mölndal. Një person i ndaluar u harrua i mbyllur në një dhomë gjatë gjithë natës. Për këtë arsye, Avokati i Popullit (JO) ka drejtuar kritikë të ashpër ndaj këtij institucioni.

Ngjarja ka ndodhur një natë dhjetori vitin e kaluar. Një grua e ndaluar u la gjatë natës në një dhomë vizitash të mbyllur, pa shtrat, pa ushqim dhe pa ujë. Ajo përdori butonin e alarmit disa herë, por asnjë punonjës nuk erdhi për ta ndihmuar.

Pas hetimit, Avokati i Popullit Per Lennerbrant konkludoi se ngjarja ishte pasojë e mungesave serioze në rregullat dhe procedurat e qendrës së ndalimit. Sipas JO-së, kjo situatë ka pasur pasoja të papranueshme për personin e ndaluar.

Si rezultat, Agjencia e Migracionit është udhëzuar që të rrisë njohuritë dhe kompetencën e stafit lidhur me rregullat për masat shtrënguese dhe të përmirësojë menaxhimin dhe drejtimin e punës operative.

JO kujton gjithashtu se në kontrolle të mëparshme të kësaj qendre në Mölndal, janë vërejtur edhe mangësi serioze në mënyrën e trajtimit të personave të ndaluar.

Në reagimin e saj zyrtar, Agjencia e Migracionit shprehet se e konsideron këtë ngjarje “jashtëzakonisht serioze” dhe pranon se kritika e bërë nga JO është e drejtë dhe e justifikuar.

Burimi: SVT