Kriza e emigracionit e vitit 2015 nuk duhet të përsëritet. Udhëheqësit e qeverisë: Dy çështje do të jenë vendimtare!

Katër partitë në pushtet në Suedi thonë se vendi nuk duhet të përjetojë më një situatë si kriza e emigracionit e vitit 2015. Sipas tyre, politika e mëparshme kishte shumë përjashtime, pak kërkesa dhe integrim të dobët, gjë që çoi në rritje të varfërisë, përjashtimit social dhe kriminalitetit. Ata theksojnë se i njëjti problem është parë edhe në vende të tjera të Europës.

Qeveria aktuale thotë se ka ndryshuar gradualisht politikën e emigracionit dhe se Suedia tani ka nivelin më të ulët të azilit që nga viti 1985. Moderatët, Demokratët e Suedisë, Kristian Demokratët dhe Liberalët deklarojnë se do të vazhdojnë me këtë kurs dhe nuk do të kthehen pas.

Rreziku për rritje të emigracionit
Liderët e Bashkimit Evropian pritet të diskutojnë situatën në Lindjen e Mesme, e cila konsiderohet e pasigurt. Sipas udhëheqësve suedezë, lufta ka ndikuar tashmë në ekonominë dhe familjet në Suedi, sidomos përmes rritjes së çmimeve të karburantit. Ata paralajmërojnë edhe për rreziqe sigurie dhe për mundësinë e rritjes së emigracionit drejt Evropës dhe Suedisë.

Ata theksojnë se nuk duan që të përsëritet situata e vitit 2015 dhe se dy çështje janë vendimtare:

Politikë më e rreptë në BE
Së pari, Suedia duhet të punojë për një politikë më të kufizuar emigracioni në të gjithë Bashkimin Evropian. Sipas tyre, vitet e fundit ka pasur më shumë dakordësi mes vendeve për të ulur azilin dhe për të siguruar që personat që refuzohen të largohen nga Evropa.

Megjithatë, ata thonë se ende ka shumë punë për të bërë. Një nga propozimet është rishikimi i konventave ndërkombëtare, në mënyrë që personat që kryejnë krime të rënda të mund të dëbohen nga vendet evropiane.

Sipas tyre, partitë e majta në Suedi dhe në Evropë janë kundër këtyre masave. Ata përmendin se disa qeveri socialdemokrate, si ajo në Spanjë, kanë dhënë leje qëndrimi për rreth 500 mijë persona që ndodheshin në BE pa dokumente. Sipas tyre, këto vendime mund të dobësojnë përpjekjet e përbashkëta për kontrollin e kufijve dhe kthimin e personave të refuzuar.

Ata shtojnë se aftësia e Suedisë për të mbajtur një politikë të rreptë varet nga funksionimi i sistemit në të gjithë BE-në dhe nga fakti që një refuzim të zbatohet realisht.

Masa më të forta brenda vendit
Së dyti, qeveria thotë se duhet të merren masa të forta brenda Suedisë. Ata paralajmërojnë se ndërsa vende si Gjermania dhe Holanda po shtrëngojnë rregullat, më shumë njerëz mund të përpiqen të shkojnë në Suedi.

Për këtë arsye, ata thonë se vendi duhet të vazhdojë në të njëjtin drejtim. Qeveria ka vendosur kërkesa më të larta për integrimin dhe dëshiron të rrisë rëndësinë e shtetësisë suedeze. Personat që lejohen të qëndrojnë duhet të mësojnë gjuhën suedeze dhe të kenë njohuri bazë për shoqërinë.

Ata theksojnë se kjo është një ndryshim i madh nga e kaluara, kur  sipas tyre edhe persona të dyshuar për krime të rënda mund të merrnin shtetësi.

Gjithashtu, qeveria planifikon të vendosë një kufi për përfitimet sociale, në mënyrë që të jetë gjithmonë më e leverdishme të punosh sesa të jetosh me ndihmë sociale. Do të vendoset edhe një kërkesë për aktivitet për personat që marrin ndihmë, si dhe programe për fëmijët, për të parandaluar trashëgiminë e përjashtimit social.

“Një jo duhet të jetë një jo”
Qeveria thekson se një pjesë shumë e rëndësishme e politikës së saj është që personat që nuk kanë të drejtë të qëndrojnë në Suedi duhet të largohen. Sipas tyre, një “po” do të thotë integrim në shoqëri, ndërsa një “jo” duhet të zbatohet pa përjashtime.

Në fund, ata kritikojnë opozitën e majtë, duke thënë se ajo dëshiron të rrisë azilin dhe të rikthejë rregulla më liberale, si leje të përhershme qëndrimi, bashkim familjar më të lehtë dhe amnisti. Sipas tyre, kjo do të ishte një kthim në politikat që sollën problemet e mëparshme.

Artikulli është nënshkruar nga kryeministri Ulf Kristersson, Jimmie Åkesson, Ebba Busch dhe Simona Mohamsson.

Burimi: Aftonbladet

Link: https://www.aftonbladet.se/debatt/a/k0MRKj/migrationskrisen-fran-2015-far-inte-upprepas